ဆွဲ၊တင်၊စစ် ခေါင်းစဉ်ဖြင့် မြို့မ ကညင်တန်းမှ ဒေသခံ တစ်ဦးကို ဖမ်းဆီး၍ ငွေ ၅ သိန်း ညှစ်ရန် ကြိုးစားလျက်ရှိ
MYARF & Rohingya Eye
RB News
22.3.2015
မောင်တော ။ ။ ရခိုင်ပြည်နယ်၊ မောင်တောမြို့နယ် မြို့မကညင်တန်း ကျေးရွာတွင် ဆွဲ၊တင်၊စစ် စစ်ဆေးလျက် ရှိပြီး ငွေကြေး ကောက်ခံမှုများ နောက်ပိုင်းတွင် မပြုလုပ်သော်လည်း ငွေအစား ကျွဲရိုင်းဘူးများ တောင်းခံခြင်း၊ ဒေသခံ တစ်ဦးထံမှ ငွေမရသဖြင့် သေနတ်ဖြင့် ရိုက်ထုသည့် အပြင် ဖမ်းဆီး၍ ငွေကျပ် ၅ သိန်း တောင်းခံလျက် ရှိကြောင်း သတင်း ရရှိပါသည်။
မောင်တောမြို့နယ် မြို့မကညင်တန်း ကျေးရွာအုပ်စုတွင် မတ်လ (၁၅) ရက်နေ့မှစ၍ ဆွဲ၊တင်၊စစ် စတင် စစ်ဆေးလျက် ရှိပြီး၊ မ.က.ဖ အတွက် နေ့လည်စာ၊ မုန့်နှင့် လဘက်ရည် စရိတ်များကို ကျေးရွာရှိ စီးပွားရေး လုပ်ငန်းရှင်များက ပေးပြီး ရွာသားများထံမှ ငွေမကောက်ခံရန် ပြောခဲ့သော်လည်း မ.က.ဖ နှင့် ကျေးရွာ အုပ်ချုပ်ရေးမှူး ဦးအဒူရာမန် တို့က မွေးတိုး ၁၀၀၀ ကျပ်၊ ပယ်ဖျက် ၃၀၀၀ ကျပ်၊ ပြောင်းရွှေ့ ၁၂၀၀၀ ကျပ်စီ အသီးသီး ကောက်ခံခဲ့ကြောင်း ဒေသခံများက RB News သို့ပြောသည်။
ထိုသို့ ငွေကောက်ခံခဲ့သည်ကို မတ်လ (၁၈) ရက်နေ့က အင်တာနက်တွင် ရေးသား ဖော်ပြခဲ့သဖြင့် မတ်လ (၁၉) ရက်နေ့တွင် ကျေးရွာ အုပ်ချုပ်ရေးမှူး ဦးအဒူရာမန်ကို နယ်ခြားစောင့် ရဲတပ်ဖွဲ့ ဌာနချုပ်သို့ ခေါ်၍ သတိပေးခဲ့သည်။ ထို့နောက် မတ်လ (၁၉) ရက်နေ့ မွန်းလွှဲပိုင်းမှစ၍ ငွေမကောက်ခံဘဲ ဆက်လက် စစ်ဆေးခဲ့သည်။ မတ်လ (၂၀) ရက်နေ့မှစ၍ ကျေးရွာ အုပ်ချုပ်ရေးမှူးနှင့် အဖွဲ့က ငွေမကောက်ခံသော်လည်း မြို့မ ကညင်တန်းတွင် တာဝန်ကျသည့် မ.က.ဖ ဒု-ဦးစီး (ရဲအုပ်) က မွေးတိုး၊ ပယ်ဖျက်၊ ပြောင်းရွှေ့ လုပ်ရသည့် အိမ်ထောင်စုတိုင်းမှ ငွေကြေး အစား ကျွဲရိုင်း အချိုရည်ဘူး ၁၀ ဘူးစီ ယူသည့်အပြင် စစ်ဆေးခံသူကို ရိုင်းပျစွာ ပြောဆို ဆက်ဆံလျက် ရှိသည်ဟု ဒေသခံများက ဆိုသည်။
ဓါတ်ပုံ ရိုက်ရာတွင်လည်း မျက်နှာသာ ထင်ထင်ရှားရှား ခွဲခြား သိရှိနိုင်ရန် ရိုက်ကူးရမည် ဖြစ်သော်လည်း အမျိုးသမီးများကို မလိုအပ်ဘဲ ဘုရ်ကာများ ချွတ်ခိုင်းသည့် အပြင် ဘုရ်ကာ ချွတ်ရာတွင် အချိန် အနည်းငယ် ကြာလျှင်လည်း ညစ်ညမ်း စကားများဖြင့် ခြိမ်းခြောက် ဆဲဆိုမှုများ ပြုလုပ်ပြီး၊ အချို့မိသားစု များကို ဓါတ်ပုံ ရိုက်မပေးဘဲ ပြန်ခိုင်းခြင်းများလည်း ပြုလုပ်သည်ဟု ဒေသခံများက ပြောပါသည်။
မတ်လ (၂၁) ရက်နေ့ ညနေ (၆) နာရီ အချိန်တွင် မာမတ်အီနုစ် (ဘ) ဦးအဘူရူး (အသက် ၂၅ နှစ်) သည် အပြောင်း အရွှေ့ ကိစ္စနှင့် ပတ်သက်၍ အထောက်အထား ခိုင်ခိုင်လုံလုံ ရှိသော်လည်း မ.က.ဖ က အဆမတန် ငွေတောင်းခံသည်ကို ၎င်းက မပေးနိုင်ကြောင်း၊ ဥပဒေနှင့် အညီ လုပ်ဆောင်သင့် ပါကြောင်း ပြောဆိုသဖြင့် နယ်ခြားစောင့်ရဲများက မကျေနပ်၍ ၎င်းအား သေနတ်ဖြင့် ထုရိုက်ခဲ့ရာ ခေါင်းကွဲသွားခဲ့သည်။ ထို့နောက် မာမတ်အီနုစ်ကို မ.က.ဖ များ ဦးဆောင်ပြီး မြို့မ ဆေးရုံသို့ ပို့ဆောင်ခဲ့သည်။
ယနေ့ မတ်လ (၂၂) ရက်နေ့တွင် (၃) မိုင်မှ နယ်ခြားစောင့် ရဲတပ်ဖွဲ့ စခန်း တာဝန်ခံ ရဲမှူးဌေးကို ကိုယ်တိုင် လာရောက်၍ မာမတ်အီနုစ်ကို ဖမ်းဆီး၍ (၃) မိုင် စခန်းသို့ ခေါ်ဆောင်သွားပြီး၊ လွှတ်ပေးရန် အတွက် ငွေကျပ် ငါးသိန်း တောင်းခံလျက် ရှိကြောင်း ဒေသခံ တစ်ဦးက RB News သို့ပြောသည်။ ယခင်က စစ်ဆေးခဲ့သည့် တရားမ၀င် ခိုးဝင်ဘင်္ဂလီ လူဦးရေ စာရင်း စစ်ဆေးရာတွင် မြို့မကညင်တန်း ရွာမှ စစ်ဆေးခံခြင်း မရှိခဲ့သလို၊ ယခု ဆွဲ၊တင်၊စစ် တွင်လည်း အာဏာပိုင်များ ထင်တိုင်းကြဲ၍ ငွေကောက်ခံနိုင်ခြင်း မရှိသဖြင့် အငြိုးထားကာ ယခုကဲ့သို့ မတရားသဖြင့် ဖမ်းဆီး ငွေညှစ်ခြင်း ပြုလုပ်ခြင်း ဖြစ်သည်ဟု ဒေသခံများက သုံးသပ် ပြောဆိုလျက် ရှိသည်။
