နောက်ဆုံးသတင်း/ဆောင်းပါးများ

Oslo Conference on Rohingyas ၌ Dr. Mahathir Mohamad ပြောကြားသည့် ဗီဒီယို မိန့်ခွန်း



မေ ၂၆၊ ၂၀၁၅
အောစလို၊ နော်ဝေး

ဒီကနေ့ မြန်မာနိုင်ငံမှာ ဖြစ်ပွားနေတဲ့ ဖြစ်ရပ်တွေနဲ့ ပတ်သက်ပြီး ကျနော် ဝမ်းနည်းမိပါတယ်။ မြန်မာနိုင်ငံကို အရှေ့တောင် အာရှ နိုင်ငံ များရဲ့ ဒေသဆိုင်ရာ အဖွဲ့အစည်း တခု ဖြစ်တဲ့ အာဆီယံ မှာ အသင်းဝင်နိုင်ငံ တနိုင်ငံ အဖြစ် ဝင်ရောက်နိုင်ဖို့ အရေးမှာ ကျနော်ဟာ အခရာ ကျခဲ့ဖူးပါတယ်။ ပထဝီ အနေအထား အရကြည့်ရင် မြန်မာနိုင်ငံဟာ အရှေ့တောင် အာရှရဲ့ အစိတ်အပိုင်းတခု ဧကန် ဖြစ်ပါတယ်။ မြန်မာနိုင်ငံကို ဖယ်ထုတ်ထားမယ် ဆိုရင် အရှေ့တောင်အာရှ ညီညွတ်ရေး ဆိုတဲ့ အယူအဆနဲ့ ဆန့်ကျင်ဖီလာ ဖြစ်နေပါလိမ့်မယ်။ ဒါပေမယ့် အခုတော့ မြန်မာနိုင်ငံက သူ့ပြည်သူတွေကို ဆက်ဆံပုံဟာ ကျနော်တို့က မြန်မာနိုင်ငံအပေါ်ဆက်ဆံသလိုမျိုး မဟုတ်တာကို တွေ့ရပါတယ်။

ကျနော်တို့က မြန်မာနိုင်ငံကို ဖယ်ထုတ်မထားချင်ခဲ့ဘူး။ ဒါပေမယ့် ဒီကနေ့ မြန်မာနိုင်ငံကတော့ လွန်ခဲ့တဲ့ နှစ်ပေါင်း ၈၀၀ လောက်ကတည်းက သူ့နိုင်ငံထဲမှာ အခြေချနေထိုင်ခဲ့တဲ့ ရိုဟင်ဂျာခေါ် မွတ်ဆလင်လူမျိုးစုတွေကို မောင်းထုတ်ဖို့ အရေးယူလုပ်ဆောင်နေပါတယ်။ သူတို့ဟာ အရင်က ဗမာပြည်မှာ နိုင်ငံသားတွေအဖြစ် အမြဲတစေ သတ်မှတ်ခံခဲ့ရပါတယ်။ မြန်မာပြည်ဆိုတာ အရင်က ဗမာပြည်ကိုပဲ ဆက်လက်ခေါ်ဝေါ်တာပဲမို့ ဒီလူမျိုးစုတွေကို သူ့နိုင်ငံသားတွေအဖြစ် လက်ခံသင့်ပါတယ်။

ဒီကနေ့ မလေးရှားနိုင်ငံမှာဆိုရင် လွန်ခဲ့တဲ့ အနှစ် ၂၀၀ လောက်ကစလို့ တခြားနိုင်ငံတွေက လာရောက်အခြေချနေထိုင်တဲ့ လူတွေအများအပြား ရှိပါတယ်။ ဒီလူတွေမှာ မလေးရှားနိုင်ငံသားတွေဖြစ်လာဖို့ အခွင့်အရေးရှိတယ်လို့ ကျနော်တို့ ဆုံးဖြတ်ခဲ့ကြတယ်။ သူတို့ကို နိုင်ငံရေးအခွင့်အရေးတွေ ပေးဖို့ ကျနော်တို့ ဆုံးဖြတ်ခဲ့ကြတယ်။ စီးပွားရေးလုပ်ငန်းနဲ့ ပတ်သက်ပြီး လေ့ကျင့်ပေးဖို့၊ မလေးရှားနိုင်ငံထဲမှာ စီးပွားရေးလုပ်ငန်းတွေ လုပ်ခွင့်ပေးဖို့ ဆုံးဖြတ်ခဲ့ကြတယ်။ သူတို့ကို ကျနော်တို့ နိုင်ငံသားတွေအဖြစ် ကျနော်တို့ သတ်မှတ်ပါတယ်။

မလေးရှားနဲ့ မတူတာကတော့ မြန်မာနိုင်ငံဟာ အဲဒီမှာ တလျှောက်လုံး နေထိုင်လာခဲ့တဲ့ ရိုဟင်ဂျာတွေကို သူ့နိုင်ငံသားတွေအဖြစ် အသိအမှတ်တောင် မပြုချင်တာကို တွေ့ရတယ်။ ဒါဟာ မြန်မာအစိုးရဖက်က အကြီးအကျယ် မတရားလွန်းတာပါပဲ။ မြန်မာအစိုးရက ပြန်လွှတ်ပေးအောင် ကျနော်တို့ရဲ့ ကြိုးပမ်းမှုကြောင့် အကျိုးရှိသွားတဲ့ သူတွေ (ဥပမာ အောင်ဆန်းစုကြည်)အနေနဲ့ အစိုးရရဲ့ ဖိနှိပ်မှုဟာ လက်သင့်ခံနိုင်စရာမရှိဘူးလို့ သဘောပေါက်ကြမယ်လို့ ကျနော် မျှော်လင့်ခဲ့မိတယ်။ ဒါပေမယ့် မြန်မာနိုင်ငံသားတွေပဲ ဖြစ်တဲ့ ရိုဟင်ဂျာတွေရဲ့ အခွင့်အရေးတွေကို ကာကွယ်ဖို့ကျတော့ မြန်မာပြည်က လူအနည်းအကျဉ်းလောက်ပဲ ရှေ့ထွက်လာဖော်ရတယ်။

ဒီဗုဒ္ဓဘာသာအများစုတိုင်းပြည်မှာ နိုင်ငံသားတွေ ဖြစ်နေကြပေမယ့် မွတ်ဆလင်တွေဖြစ်နေတဲ့ ရိုဟင်ဂျာတွေရဲ့ ပြဿနာအပေါ်မှာ အပြည်ပြည်ဆိုင်ရာအသိုင်းအဝိုင်းကနေ အထူးအာရုံစိုက်ကြဖို့ ကျနော်မျှော်လင့်ပါတယ်။ သူတို့ဟာ မြန်မာပြည်မှာ နေထိုင်ခွင့်ရသင့်ပြီး ဖိနှိပ်မှုမရှိဘဲ နေထိုင်ခွင့်လည်း ရသင့်ပါတယ်။ ဘာသာမတူတဲ့ လူမျိုးစုတွေအပေါ်မှာ နားလည်သည်းခံမှုဆိုတာ ရှိရပါတယ်။

ကျနော်ထပ်ပြီး ပြောလိုတာက မလေးရှားမှာဆိုရင် မွတ်ဆလင်တွေဟာ လူများစုဖြစ်ပေမယ့် တခြားဘာသာ သက်ဝင်သူတွေကိုလည်း စာနာထောက်ထားစိတ်နဲ့ ဆက်ဆံတယ်။ သူတို့ကို မလေးရှားနိုင်ငံသားတွေဖြစ်လာဖို့ အခွင့်အရေးတွေကို ပေးတယ်။ ဒီနိုင်ငံရဲ့ ဥပဒေတွေ အကျိုးကို ခံစားခွင့် ပေးတယ်။ အပြည်ပြည်ဆိုင်ရာအသိုင်းအဝိုင်းအနေနဲ့ တခြားတိုင်းပြည်တွေကို သင်္ဘောတွေနဲ့ ထွက်ပြေးဖို့ ဖိအားပေးခံရတဲ့ ရိုဟင်ဂျာတွေရဲ့ ပြဿနာအပေါ် အာရုံစိုက်ကြဖို့ ကျနော့်အနေနဲ့ မျှော်လင့်ပါတယ်။ ဒီလို ထွက်ပြေးလာကြတဲ့ ရိုဟင်ဂျာတွေထဲက အများအပြားဟာ ပင်လယ်ပြင်မှာ ရေနစ်သေကုန်ကြပြီ။ ဘာကြောင့်လဲဆိုတော့ တခြားတိုင်းပြည်တွေဆီ သူတို့ကို သယ်ဆောင်သွားဖို့အတွက် သင်္ဘောကောင်းကောင်းတွေကို မရနိုင်ခဲ့လို့ပဲဖြစ်တယ်။

ဒါဟာ လူသားတွေအဖို့ ကြေကွဲဝမ်းနည်းစရာအဖြစ်အပျက်ပါဘဲ။ ဒီလို ဒီမိုကရေစီနိုင်ငံတခုဖြစ်လာဖို့ ကြိုးပမ်းနေတယ်ဆိုတဲ့ တိုင်းပြည်တခုအဖြစ်နဲ့ မလျော်ညီစွာဘဲ ဖိနှိပ်ခံနေရတဲ့ ကံမကောင်းအကြောင်းမလှတဲ့ မြန်မာနိုင်ငံက လူမျိုးနွယ်စုတခုကို အပြည်ပြည်ဆိုင်ရာအသိုင်းအဝိုင်းကနေ ကူညီပေးလိမ့်မယ်လို့ ကျနော် တကယ်ပဲ ယုံကြည်ပါတယ်။ ကျေးဇူးတင်ပါတယ်။

Comment ရေးရန်

Rohingya Exodus