နောက်ဆုံးသတင်း/ဆောင်းပါးများ

ဘင်္ဂလီ အမည်ဖြင့် နိုင်ငံသားကဒ်၊ နိုင်ငံသား စီစစ်ခံရန် အစိမ်းနုရောင်ကဒ် လက်ခံရန် စည်းရုံးလျက်ရှိ



RB News
24.7.2015

မောင်တော ။ ။ ရခိုင်ပြည်နယ်၊ မောင်တောမြို့သို့ ဇူလိုင်လ (၁၈) ရက်နေ့က ရခိုင်ပြည်နယ် ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ တာဝန်ခံ ဦးသိန်းဆွေ ရောက်ရှိလာပြီး၊ မောင်တော မြို့နယ်ရှိ ပါတီရုံးတွင် ပြည်နယ် လွှတ်တော် ကိုယ်စားလှယ် ဦးအောင်မျိုးမင်း အပါအ၀င် ပါတီဝင် အချို့နှင့် ပါတီကိစ္စရပ် ဆိုင်ရာများ ဆွေးနွေးခဲ့ပြီး၊ ဦးအောင်မျိုးမင်း နှင့်လည်း သီးသန့် ဆွေးနွေးခဲ့ကြောင်း သိရသည်။

ထိုသို့ ဆွေးနွေးရာတွင် ယာယီ သက်သေခံ ကဒ်ပြား (၀ှိုက်ကဒ်) ကိုင်ဆောင်သူများသည် ဥပဒေအရ မဲပေးပိုင်ခွင့် မရှိသောကြောင့် ဥပဒေအရ နိုင်ငံသား စီစစ်ခံရမည် ဖြစ်ကြောင်း၊ ပါတီ အောင်နိုင်ရေးနှင့် မဲထည့်ပိုင်ခွင့် ရရှိရန် အစိုးရနှင့် ညှိနှိုင်းပြီး၊ အမျိုးသား မှတ်ပုံတင် ကဒ်ပြား (သုံးခေါက်ချိုး) ရှိသူများကို ဘင်္ဂလီ လူမျိုး အမည်ဖြင့် နိုင်ငံသား စီစစ်ရေး ကဒ်ပြား (ပန်းရောင်) ထုတ်ပေးမှာ ဖြစ်ကြောင်း၊ အမျိုးသား မှတ်ပုံတင် ကဒ်ပြား မရှိသူများ အနေဖြင့် အစိမ်းနုရောင် ကဒ်ပြား ယူပြီး နိုင်ငံသား ဖြစ်ခွင့် လျှောက်ထားရမှာ ဖြစ်ကြောင်း၊ ပြင်ပ စကားနားထောင်ပြီး စစ်ဆေးမခံရင် ရသင့် ရထိုက်သည့် အခွင့်အရေး ဆုံးရှုံးသွားမှာ ဖြစ်ကြောင်း၊ ယခု လွှတ်တော်တွင် ခင်ဗျားတို့ လူမျိုး ရှိနေတာကြောင့် ခင်ဗျားတို့ အခြေအနေကို တင်ပြခွင့် ရနေကြောင်း၊ မဲထည့်ခွင့် ဆုံးရှုံးသွားလျှင် လွှတ်တော်မှာ ခင်ဗျားတို့ အနေဖြင့် တင်ပြခွင့် ဆုံးရှုံး သွားမှာ ဖြစ်ကြောင်း၊ အစိမ်းနုရောင် ကဒ်ပြား လက်ခံပြီး စစ်ဆေးခံရန် ဦးအောင်မျိုးမင်းမှ စည်းရုံးရမှာ ဖြစ်ကြောင်း စသည်ဖြင့် ဦးသိန်းဆွေက ပြောဆိုခဲ့သည်ဟု ဒေသခံ တစ်ဦးက RB News သို့ပြောသည်။ 

ဇူလိုင်လ (၂၂) ရက်နေ့တွင် မောင်တော မဲဆန္ဒနယ်မှ ပြည်သူ့ လွှတ်တော် ကိုယ်စားလှယ် ဦးအောင်ဇော်ဝင်း၏ ညီဖြစ်သူ ဦးမျိုးကိုကို ဦးဆောင်သည့် အဖွဲ့တစ်ဖွဲ့ ရန်ကုန်မြို့မှ မောင်တောမြို့သို့ ရောက်ရှိလာခဲ့သည်။ အဆိုပါ အဖွဲ့တွင် (၁၁) ဦး ပါရှိပြီး မောင်တောမြို့ဖွား (၇) ဦးနှင့် ဘူးသီးတောင်မြို့ဖွား (၄) ဦး ဖြစ်ကြောင်း သိရသည်။ 

ဇူလိုင်လ (၂၃) ရက်နေ့တွင် မောင်တောမြို့ ခွဆုံရှိ ဒေသဖွံ့ဖြိုးရေး ရုံးခန်းတွင် ကျေးရွာ အသီးသီးမှ ကျေးရွာ လူကြီး အချို့နှင့် ကျေးရွာ အုပ်ချုပ်ရေးမှူး များကို ခေါ်ယူ တွေ့ဆုံ ဆွေးနွေးခဲ့သည်။ 

အဆိုပါ (၁၁) ဦးအဖွဲ့မှ တစ်ဦးက ပြောဆိုရာတွင် မိမိတို့ ခေတ်အဆက်ဆက်က အခွင့်အရေး ဆုံးရှုံးလာသည်မှာ နှစ် ၂၀ ကျော်သွားပြီ ဖြစ်ကြောင်း၊ မည်သည့် နိုင်ငံကမှ မိမိတို့၏ အခွင့်အရေး ယူပေးနိုင်ခြင်း မရှိကြောင်း၊ ပေးနိုင်မည်လည်း မဟုတ်ကြောင်း၊ မိမိတို့ အနေဖြင့် ပြင်ပ စကားနားထောင်လျှင် သမိုင်းတွင် မှားလိမ့်မယ် ဖြစ်ကြောင်း၊ အစိုးရက မည်သည် အခါမှ ရိုဟင်ဂျာကို လက်ခံမည် မဟုတ်ကြောင်း၊ ယခု အစိုးရပေးနေသည့် အခွင့်အရေးကို လက်လွှတ် မခံသင့်ကြောင်း၊ အမျိုးသား မှတ်ပုံတင် ကဒ်ပြား ရှိသူများ နိုင်ငံသား လျှောက်လျှင် ဘင်္ဂလီဖြင့် တစ်ပတ်အတွင်း ပန်းရောင်ကဒ် ရမည် ဖြစ်ကြောင်း၊ အမျိုးသား မှတ်ပုံတင် မရှိပါက အစိမ်းနုရောင် ကဒ်ပြားကို လက်ခံရမည် ဖြစ်ကြောင်း၊ ထိုကဒ်ပြားကို လက်ခံလျှင် ပန်းရောင် ရရန် လွယ်ကူသွားမည် ဖြစ်ကြောင်း၊ လက်မခံသူများကို ငွေဖြင့် မက်လုံးပေး၍ လက်ခံလာအောင် ကြိုးစား စည်းရုံးရန် လိုကြောင်း၊ မိမိတို့ကို ပေးနေသည့် အခွင့်အရေးကို မယူတတ်လျှင် ယခုထက် အခက်အခဲ ရောက်သွားမည်မှာ သေချာကြောင်း ပြောဆိုခဲ့သည်။ 

ဒေသခံများက ၎င်းတို့ အနေဖြင့် အမျိုးမျိုး မက်လုံးပေး ပြောဆိုနေသော်လည်း အာမခံချက်နှင့် ယုံကြည်နိုင်ရန် မရှိသည့် စကားများ ဖြစ်သောကြောင့် အစိုးရ ဘက်တော်သားများ အပ ကျန်သည့် ရိုဟင်ဂျာများက လုံးဝ လက်ခံမှာ မဟုတ်ကြောင်း ပြောဆိုနေကြသည်။

Comment ရေးရန်

Rohingya Exodus