ရွှေဇားမှ နယ်ခြားစောင့် ရဲများက ဒေသခံများကို ဘင်္ဂလား ဆင်းမ်ကဒ် သုံးနေသည်ဟု စွပ်စွဲ၍ ငွေညှစ်

မောင်တော ။ ။ ရခိုင်ပြည်နယ်၊ မောင်တော မြို့နယ် ရွှေဇား ကျေးရွာအုပ်စု၊ အလယ်ရွာမှ နူရ်ကာလာမ် (ဘ) ဦးဟာလာမျာ (အသက် ၂၅ နှစ်) သည် ရွှေဇား စေတီပြင်ဈေးရှိ ၎င်း၏ ကွမ်းယာဆိုင်တွင် ကွမ်းရောင်းနေစဉ် နယ်ခြားစောင့်ရဲများ ရောက်ရှိလာပြီး ၎င်းသုံးနေသည့် GSM ဖုန်းကို စစ်ဆေးမည်ဟု ဆိုကာ ယူ၍ ဘင်္ဂလား ဆင်းမ်ကဒ် ထည့်ပေးပြီး လုပ်ကြံ စွပ်စွဲ ခြိမ်းခြောက်ကာ ငွေကျပ် နှစ်သိန်း ညှစ်ယူသည့် အပြင် ကိုယ်ထိ လက်ရောက် စော်ကားမှုများလည်း ပြုလုပ်ခဲ့ကြောင်း ဒေသခံ တစ်ဦးက RB News သို့ပြောပါသည်။ 

စက်တင်ဘာလ (၂၁) ရက်နေ့တွင် ရွှေဇား ကင်းဘဲရွာမှ မုစ်တာဖာကာမာလ် (ဘ) ဦးနိုရာမတ် (အသက် ၂၇ နှစ်) သည် ၎င်း၏ အိမ်ရှေ့တွင် GSM ဖုန်းဖြင့် သီချင်းနားထောင် နေစဉ်၊ ရွာထဲပတ်နေသည့် ရွှေဇား ကညင်ချောင်း နယ်ခြားစောင့် ရဲတပ်ဖွဲ့ စခန်းမှ နယ်ခြားစောင့် ရဲများကို မြင်၍ မဟုတ်မတရား စွပ်စွဲခံရပြီး ဖမ်းဆီးခံရမည်ကို စိုးရိမ်၍ ရှောင်ထွက် သွားရာ နယ်ခြားစောင့် ရဲများက လိုက်လံဖမ်းဆီးပြီး ရိုက်နှက်၍ ခန္ဓာကိုယ် အနှံ့ ရှာဖွေခဲ့သော်လည်း မည်သည့် ပစ္စည်း တစ်စုံတစ်ရာမှ မရှိခဲ့ပေ။ သို့သော်လည်း နယ်ခြားစောင့် ရဲများက ဘင်္ဂလား ဆင်းမ်ကဒ် သုံးနေသည်ဟု မဟုတ်မမှန် စွပ်စွဲ၍ ငွေကျပ် သုံးသိန်း ညှစ်ယူခဲ့သည်။ 

အဆိုပါ ကင်းစခန်းမှ နယ်ခြားစောင့် ရဲများသည် ညအချိန်တွင် ရွာထဲသို့ ၀င်ရောက်၍ ရိုဟင်ဂျာများ၏ နေအိမ် နောက်ဖေးများတွင် ပုန်းအောင်းပြီး အိမ်သူအိမ်သားများ ဖုန်းဖြင့် စကားပြောဆိုသံ ကြားလျှင် အိမ်ထဲသို့ ၀င်ရောက်ကာ ဘင်္ဂလား ဆင်းမ်ကဒ်ဖြင့် စကားပြောနေသည်ဟု စွပ်စွဲ၍ ငွေညှစ်ခြင်း၊ ရိုက်နှက်ခြင်းများ မကြာခဏ ပြုလုပ်လေ့ ရှိသဖြင့် ဒေသခံများနှင့် နယ်ခြားစောင့် ရဲများ အကြား တင်းမာမှုများ ဖြစ်ပွားပြီး မလိုလားအပ်သည့် ပြဿနာများ ဖြစ်ပွားလာမည်ကို စိုးရိမ်ရသည်ဟု ဒေသခံများက ပြောပါသည်။