ဆွဲ၊တင်၊စစ် တွင် မွေးကင်းစ ကလေးငယ်များကို အိမ်ထောင်စု စာရင်း၌ တင်မပေး

မောင်တော ။ ။ ရခိုင်ပြည်နယ်၊ မောင်တော မြို့နယ်၊ မြို့မတောင် ရပ်ကွက်တွင် မတ်လ (၁၉) ရက်နေ့မှစ၍ ဆွဲ၊တင်၊စစ် စစ်ဆေးသည့် အဖွဲ့ ရောက်ရှိလာပြီး ဓါတ်ပုံ ရိုက်ခ ငွေကျပ် ၃ ထောင် ကောက်ခံလျက် ရှိသည်။ မွေးကင်းစ ကလေးတစ်ဦးကို အိမ်ထောင်စု စာရင်းတွင် တင်မည်ဆိုပါက ရဲစခန်းမှ ထောက်ခံစာ၊ သက်သေ (၂) ဦးနှင့် သက်ဆိုင်ရာ ကျေးရွာ အုပ်ချုပ်ရေးမှူး၏ နိုင်ငံအတွင်း မွေးဖွားကြောင်း ထောက်ခံချက်များ လိုအပ်လျက် ရှိနေပြီ၊ အဆိုပါ ထောက်ခံချက်များ လွယ်လွယ်ကူကူ မရသောကြောင့် ကလေးများကို အိမ်ထောင်စု စာရင်းတွင် တင်နိုင်ရန် အခက်အခဲ ကြုံတွေ့လျက် ရှိနေကြသည်။ 

ထောက်ခံချက်များ ရ၍ တင်ပြလျှင်လည်း ဆွဲ၊တင်၊စစ် စစ်ဆေးသည့် အဖွဲ့ကို ငွေကျပ် တစ်သောင်း ပေးရသည်။ သို့သော်လည်း ချက်ချင်း တင်မပေးဘဲ၊ နယ်မြေရုံးမှ ခွင့်ပြုချက်ရမှသာ တင်ပေးမည်ဟု ပြောဆိုသောကြောင့် ကလေး တစ်ဦးတစ်ယောက်ကိုမှ တင်နိုင်ခြင်း မရှိသေးကြောင်း ဒေသခံများက RB News သို့ပြောသည်။ 

အပြောင်းအရွှေ့ များကိုလည်း အလွယ်တကူ ပြုလုပ်ပေးခြင်း မရှိသလို၊ တစ်ရပ်ကွက်ထဲတွင်ပင် အိမ်ထောင်စု စာရင်း တစ်ခုမှ အခြားတစ်ခုသို့ ပြောင်းလိုလျှင် အထောက်အထား များနှင့် တကွ ငွေကျပ် ငါးသောင်းစီ ပေးနေရသည်ဟု ဒေသခံများက ဆိုသည်။ အခြားမြို့ပေါ် ရပ်ကွက်များတွင်လည်း ထိုသို့ စစ်ဆေးခဲ့ကြောင်း သိရှိရသည်။ 

ယခင်နှစ်က ပြုလုပ်ခဲ့သည့် ဆွဲ၊တင်၊စစ် တွင် မွေးကင်းစ ကလေးများကို အိမ်ထောင်စု စာရင်း၌ တင်ရာတွင် လွယ်ကူစွာ တင်နိုင်ခဲ့ပြီး၊ ယခုကဲ့သို့ သက်သေ နှစ်ဦးနှင့် ရဲစခန်း ထောက်ခံစာများ မလိုအပ်ခဲ့ကြောင်း၊ ယခုအခါ လွယ်လွယ်ကူကူ တင်မပေးခြင်းမှာ ရည်ရွယ်ချက် ရှိရှိဖြင့် နိုင်ငံမဲ့ဘ၀သို့ ရောက်အောင် ကြိုတင် အကွက်ချ လုပ်ဆောင်နေခြင်း ဖြစ်သည်ဟု မြို့မိမြို့မ အချို့က ပြောပါသည်။