ဘူးသီးတောင် မြို့နယ် ရဲတပ်ဖွဲ့မှူးနှင့် အဖွဲ့က ဒေသခံ ရိုဟင်ဂျာ နှစ်ဦးထံမှ ငွေညှစ်
RB News
28.3.2016
ဘူးသီးတောင် ။ ။ ရခိုင်ပြည်နယ်၊ ဘူးသီးတောင် မြို့နယ်သို့ ဈေးဝယ်ရန် လာရောက်သည့် ဦးလှဖေ ကျေးရွာမှ ဦးကော်ဘိရ်အာမတ် (ဘ) ဦးဟာကိမ်းအလီနှင့် ဦးအေဆာန်အူလ္လာ (ဘ) ဦးဖော်ဆူမျာ တို့သည် ဈေးဝယ်ပြီး အပြန်တွင် စက်လှေဆိပ်၌ အမည်မသိ ရဲနှစ်ဦးက ၎င်းတို့အား လက်ထိပ်ခတ် ဖမ်းဆီး၍ မြို့မရဲစခန်းသို့ ခေါ်ဆောင် သွားခဲ့သည်။
၎င်းတို့အား စခန်းတွင် ချုပ်နှောင်ထားပြီး ရဲများက လူမဆန်စွာ နှိပ်စက်ခဲ့သည်။ ထို့နောက် ရဲများက ၎င်းတို့အား စွဲချက်တင်ရန် အမှုမရှိသဖြင့် ဘင်္ဂလား ဆင်းမ်ကဒ် မိသည်ဟု လုပ်ကြံ စွပ်စွဲ၍ မြို့နယ် ရဲတပ်ဖွဲ့မှူး ရဲမှူးအောင်ဘာလေနှင့် ရဲအုပ်မြတ်ထွေးတို့က ငွေကျပ် ၂၆ သိန်း ညှစ်ယူပြီး ယင်းနေ့ ညပိုင်းတွင် ပြန်လည် လွှတ်ပေးခဲ့ကြောင်း ဒေသခံ တစ်ဦးက RB News သို့ပြောသည်။ ရဲမှူးအောင်ဘာလေနှင့် ရဲအုပ်မြတ်ထွေးတို့က ဦးကော်ဘိရ်အာမတ် ထံမှ ငွေကျပ် ၁၀ သိန်း၊ ဦးအေဆာန်အူလ္လာ ထံမှ ငွေကျပ် ၁၆ သိန်း ညှစ်ယူခဲ့သည်ဟု အဆိုပါ ဒေသခံက ပြောပါသည်။
ရဲတပ်ဖွဲ့ဝင်များ၏ အကြောင်းမဲ့ ဖမ်းဆီးမှု၊ လူမဆန်စွာ ညှဉ်းပန်း နှိပ်စက်မှုတို့ကြောင့် ဘူးသီးတောင် ဈေးသို့ ဈေးဝယ်လာရန်ပင် ခက်ခဲလျက် ရှိသည်ဟု ဆိုသည်။
