ဘူးသီးတောင်မှ ရဲများက ဒေသခံ တစ်ဦးကို အကြောင်းမဲ့ ဖမ်းဆီး၍ ငွေသိန်း ၅၀ တောင်းခံနေ
29.6.2016
ဘူးသီးတောင် ။ ။ ရခိုင်ပြည်နယ်၊ ဘူးသီးတောင် မြို့နယ် မြို့ပေါ်မှ ရဲတပ်ဖွဲ့ဝင် များသည် နယ်ခြားစောင့် ရဲတပ်ဖွဲ့၏ လက်အောက်ခံ ကျေးလက် ဒေသများရှိ ငွေကြေး ချမ်းသာသူများကို ပစ်မှတ်ထား၍ မြို့ပေါ်လာသည့် အခါ ဖမ်းဆီးပြီး ငွေညှစ်ခြင်းများ ပြုလုပ်လျက် ရှိကြောင်း သတင်း ရရှိပါသည်။
ဇွန်လ (၂၇) ရက်နေ့တွင် ဘူးသီးတောင် မြို့နယ် တောင်ပိုင်း စိမ်းညှင်းပြား ကျေးရွာမှ နွားအရောင်းအ၀ယ် လိုင်စင်စီ ရထားသူ ဦးမာမတ်နူရ်ကို မြို့ပေါ်လာစဉ် ရဲတပ်ဖွဲ့ဝင် များက ဖမ်းဆီး၍ လူမဆန်စွာ ညှဉ်းပန်း နှိပ်စက်ကာ ပြန်လွှတ်ပေးရန် အတွက် ငွေကျပ် သိန်း (၅၀) တောင်းခံလျက် ရှိကြောင်း ဒေသခံများက RB News သို့ပြောသည်။ ၎င်းအား ဖမ်းဆီးခြင်းမှာ မည်သည့် အကြောင်းပြချက်မှ မပါဘဲ ငွေကြေး တတ်နိုင်သူ ဖြစ်သောကြောင့် ပစ်မှတ်ထား၍ ဖမ်းဆီးပြီး ငွေညှစ်နေခြင်း ဖြစ်သည်။ ဦးမာမတ်နူရ် ပြန်လည် လွတ်မြောက်ရေး အတွက် ရခိုင်လုပ်ငန်းရှင် ပွဲစားကြီး တစ်ဦးကလည်း လှုပ်ရှားနေသည်ဟု အမည်မဖော်လိုသူ ရဲအရာရှိ တစ်ဦးက ပြောသော်လည်း မည်သည့် အကြောင်းကိစ္စကြောင့် ပြန်လည် လွတ်မြောက်ရေး အတွက် ကြိုးစားနေသည်ကို မသိရဟု ဒေသခံများက ဆိုသည်။
ဘူးသီးတောင် မြို့ပေါ်ရှိ ရဲတပ်ဖွဲ့ဝင်များသည် လူမျိုးရေး ခွဲခြား၍ ဒေသခံ ရိုဟင်ဂျာများကို အကြောင်းမဲ့ ဖမ်းဆီးပြီး ငွေညှစ်နေသည်မှာ စစ်အစိုးရ လက်ထက်ကပင် ဖြစ်သော်လည်း ယခုအချိန်ထိ နိုင်ငံတော် အစိုးရမှ အရေးယူ ဆောင်ရွက် ပေးခြင်း မရှိဟု ဒေသခံများက ပြောပါသည်။
