မောင်တော မြို့ပေါ်မှ ရဲ (၃) ဦးက ယာဉ်ပိုင်ရှင်တစ်ဦးကို အကြောင်းမဲ့ ဖမ်းဆီး ငွေညှစ်
Rohingya Eye
RB News
31.8.2016
မောင်တော ။ ။ ရခိုင်ပြည်နယ်၊ မောင်တောမြို့နယ် ရွှေဇား ကျေးရွာအုပ်စု၊ ဂူနာရွာမှ ဦးမောင်မောင်တင် (ဘ) ဦးအာချော်ဖ်အလီ (အသက် ၃၇ နှစ်) သည် သြဂုတ်လ (၂၉) ရက်နေ့ ည ၇း၁၅ နာရီအချိန်တွင် ၎င်း၏ မှန်လုံကားကို ပြုပြင်ရန် မြို့ပေါ်သို့ သွားရောက်စဉ် နာရီစင်ခွဆုံရှေ့ ခေတ္တ ရပ်နားခဲ့ရာ ခရိုင် ဒုစရိုက် နှိမ်နင်းရေး ရဲအဖွဲ့မှ တပ်သားစိုးဝင်းနှင့် အခြားတစ်ဦး ရောက်ရှိလာပြီး ရှာဖွေမှုများ ပြုလုပ်ခဲ့သည်။
ရှာဖွေပြီးနောက် ပစ္စည်းတစ်စုံတစ်ရာ မတွေ့ရှိသော်လည်း ၎င်းတို့အား ငွေကျပ် ၃ သောင်း ပေးရန် တောင်းသောကြောင့် ယာဉ်ပိုင်ရှင်နှင့် အချေအတင် စကားများခဲ့ကြသည်။ ထို့နောက် ကားပိုင်ရှင် ဖြစ်သူ ကားပေါ်မှ ဆင်းနေစဉ် စိုးဝင်းက အများပြည်သူများ ရှေ့မှောက်တွင် ပါးရိုက်ပြီး လက်ထိပ်ခတ်ကာ ကားထဲသို့ ပြန်သွင်းခဲ့သည်။ နာရီဝက်ခန့် အကြာတွင် မြို့မရဲစခန်းမှ နယ်ထိန်းအဖွဲ့ တပ်ကြပ်ကြီး စံလှအောင် ရောက်ရှိလာကာ ယာဉ်ပိုင်ရှင်ကို ကားနှင့်အတူ ရဲစခန်းသို့ ဖမ်းဆီး ခေါ်ဆောင် သွားခဲ့သည်။
ထို့နောက် ည (၉) နာရီအချိန်တွင် ဖမ်းဆီးသည့် ရဲ (၃) ဦးကို ငွေကျပ် တစ်သိန်း ပေးမှ ပြန်လည် လွှတ်ပေးခဲ့ကြောင်း ဒေသခံတစ်ဦးက RB News သို့ပြောသည်။
တပ်ကြပ်ကြီး စံလှအောင်သည် ငွေကြေး တတ်နိုင်သည့် မြို့ခံ ရိုဟင်ဂျာများထံမှ အချိန်မတော် ငွေတောင်းခံခြင်း၊ ငွေမပေးပါက ရဲစခန်းသို့ ဖမ်းဆီး ခေါ်ဆောင်သွားပြီး ငွေညှစ်ကြောင်း၊ တပ်သားစိုးဝင်းသည် ခရိုင် ရဲတပ်ဖွဲ့မှူး၊ ဒုရဲမှူးကြီး ဥာဏ်ဝင်းဦါ်၏ တပည့်အရင်း တစ်ဦး ဖြစ်သောကြောင့် ၎င်း၏ အရှိန်အ၀ါကို သုံး၍ နည်းမျိုးစုံဖြင့် ငွေညှစ်နေသော အကျင့်ပျက် ရဲဝန်ထမ်း တစ်ဦး ဖြစ်ကြောင်း ဒေသခံများက ပြောပါသည်။
တာဝန်ရှိ အာဏာပိုင် လူကြီးမင်းများ အနေဖြင့် အဖြစ်မှန်ကို သေချာစွာ စုံစမ်းလေ့လာ၍ အကျင့်ပျက်ပြီး သောင်းကျန်းသူများ ပမာ သောင်းကျန်းနေသည့် ရဲဝန်ထမ်းများကို ထိရောက်စွာ အရေးယူ ဆောင်ရွက် ပေးပါရန် မြို့ခံ လူထုကိုယ်စား ဒေသခံတစ်ဦးက RB News သို့ပြောပါသည်။
