ကျောက်ပြင်ဆိပ် ကျေးရွာ အုပ်ချုပ်ရေးမှူးနှင့် နယ်ခြားစောင့်ရဲများ ပူးပေါင်း၍ ရွာသားများထံမှ ငွေညှစ်

ဖေဖော်ဝါရီလ (၁) ရက်နေ့တွင် ကျောက်ပြင်ဆိပ် ကျေးရွာမှ အကျင့်ပျက် အမျိုးသမီး တစ်ဦးဖြစ်သည့် ဒေါ် ----- (အသက် ၃၇ နှစ်) က ကိုယ်ဝန်ဖျက်ချခဲ့သည်။ ထိုသတင်းကို ကျေးရွာအုပ်ချုပ်ရေးမှူးက ကြားသိပြီးနောက် နယ်ခြားစောင့်ရဲတပ်ဖွဲ့ ကင်းစခန်းသို့ တိုင်တန်းခဲ့ရာ ယင်းနေ့တွင်ပင် အမျိုးသမီးကို ဖမ်းဆီးခေါ်ဆောင်သွားပြီး ကိုယ်ဝန်မည်သူနှင့် ရရှိခဲ့သနည်းဟု မေးမြန်းပြီးနောက် ကျေးရွာအုပ်ချုပ်ရေးမှူးနှင့် နယ်ခြားစောင့်ရဲများက ယင်းကျေးရွာမှ ငွေကြေးချမ်းသာသူ ဦးဆောယာဒ်အာခ်ဘောရ် (အသက် ၅၀ နှစ်) နှင့် ရခဲ့သည်ဟု ပြောခိုင်းခဲ့သည်။ 

ထို့နောက် ကျေးရွာအုပ်ချုပ်ရေးမှူးက ဦးဆောယာဒ်အာခ်ဘာရ်ကို ၎င်း၏ အိမ်သို့ခေါ်၍ ဒေါ် ---- က ဦးဆောယာဒ်အာခ်ဘောရ်နှင့် ကိုယ်ဝန်ရရှိခဲ့သည်ဟု နယ်ခြားစောင့်ရဲများအား တိုင်တန်းထားကြောင်း၊ ဖမ်းဆီး ထောင်ချခံရမည်ဟု ခြိမ်းခြောက်၍၊ ငွေ (၅) သိန်းပေးပါက ကယ်တင်နိုင်မည်ဟု ပြောဆိုခဲ့သည်။ ဦးဆောယာဒ်အာခ်ဘောရ်ကလည်း ဖမ်းဆီးညှဉ်းပန်းနှိပ်စက်ခံရမည်ကို စိုးရိမ်၍ ငွေကျပ် ၄ သိန်းခွဲပေးလိုက်ကြောင်း ဒေသခံတစ်ဦးက RB News သို့ပြောသည်။ အုပ်ချုပ်ရေးမှူးက ဦးဆောယာဒ်အာခ်ဘောရ် ထံမှ ညှစ်ယူခဲ့သည့်ငွေများကို နယ်ခြားစောင့်ရဲများအား ခွဲဝေမပေးဘဲ တစ်ဦးတည်း ယူခဲ့သည်။ 

နယ်ခြားစောင့်ရဲများက ရွာအတွင်းသို့ လာရောက်ပြီး ဦးဆောယာဒ်အာခ်ဘောရ်ကို အကြိမ်ကြိမ် ရှာဖွေပြီးနောက် ဖေဖော်ဝါရီလ (၅) ရက်နေ့တွင် ငွေကျပ် ၁၅ သိန်း ညှစ်ယူခဲ့သည်။ ထို့နောက် ၁၅ သိန်းမှ နယ်ခြားစောင့်ရဲများက ၅ သိန်း၊ ကျေးရွာအုပ်ချုပ်ရေးမှူးက ၅ သိန်းနှင့် အမျိုးသမီးက ၅ သိန်း ခွဲဝေယူခဲ့ကြသည်။ 

ဦးဆောယာဒ်အာခ်ဘောရ်သည် အကျင့်ပျက်တစ်ဦးမဟုတ်ဘဲ အကျင့်စာရိတ္တ ကောင်းမွန်သူ တစ်ဦးဖြစ်သည်။ ၎င်းအား လုပ်ကြံစွပ်စွဲရခြင်းမှာ ကျေးရွာအုပ်ချုပ်ရေးမှူးနှင့် နယ်ခြားစောင့်ရဲများက ငွေညှစ်၍ ရမည်ကို သိခြင်းကြောင့် ဖြစ်သည်ဟု ဒေသခံများက ပြောပါသည်။

ဇန်န၀ါရီလ (၂၃) ရက်နေ့တွင် ကျောက်ပြင်ဆိပ်ကျေးရွာမှ ဦးဂျော်မိလ် (ဘ) ဦးဆောယာဒ်ကော်ရိမ် ဆိုသူက ၎င်း၏ ခယ်မဖြစ်သူနှင့် စကားများခဲ့သည်ကို အကြောင်းပြု၍ ကျေးရွာအုပ်ချုပ်ရေးမှူးနှင့် ညီတော်စပ်သူ ရပ်မိရပ်ဖ ဦးဟာဘီအုလ္လာက နယ်ခြားစောင့်ရဲတပ်ဖွဲ့ ကင်းစခန်း တာဝန်ခံ အတွက်ဟု ဆိုကာ ငွေကျပ် ၅ သောင်း ညှစ်ယူခဲ့သည်။ ငွေမပေးပါက နယ်ခြားစောင့်ရဲများက လာရောက်၍ ဖမ်းဆီးခေါ်ဆောင်သွားမည်ဟု ခြိမ်းခြောက်ခဲ့သည်။ တဖန် ကျေးရွာအုပ်ချုပ်ရေးမှူးက ဦးဂျော်မိလ် ကို ဆင့်ခေါ်၍ နယ်ခြားစောင့်ရဲတပ်ဖွဲ့ ကင်းစခန်းမှူး၏ အမိန့်အရဟု ဆိုကာ ငွေကျပ်တစ်သိန်း တောင်းခံရာ ဦးဂျော်မိလ် အုပ်ချုပ်ရေးမှူး၏ ညီဖြစ်သူကို နယ်ခြားစောင့်ရဲအတွက်ဟု ဆိုကာ ငွေကျပ် ၅ သောင်း ပေးခဲ့သည်ဟု ရှင်းပြသော်လည်း အုပ်ချုပ်ရေးမှူးက “အဲဒါငါမသိဘူး၊ ငါ့ကို တစ်သိန်းပေးရမယ်၊ မပေးရင် ဖမ်းခံရမယ်” ဟု ခြိမ်းခြောက်၍ ငွေကျပ် တစ်သိန်း ညှစ်ယူခဲ့သည်။ 

ဇန်န၀ါရီလ (၁၀) ရက်နေ့တွင်လည်း ယင်းကျေးရွာမှ အီနုစ် (ဘ) ဦးအဒူရှကူရ် (အသက် ၁၄ နှစ်) နှင့် ကော်လိမ်ဂျူဟာရ် (ဘ) ဦးရှောဘိရ် (အသက် ၁၈ နှစ်) တို့ အချင်းချင်း ရန်ဖြစ်ခဲ့သည်ကို ကျေးရွာအုပ်ချုပ်ရေးမှူးထံ တိုင်ကြားခဲ့ရာ အုပ်ချုပ်ရေးမှူးက နယ်ခြားစောင့်ရဲများ ခေါ်လာပြီး ကော်လိမ်ဂျူဟာရ် ထံမှ ငွေကျပ် ၂ သိန်း ညှစ်ယူခဲ့သည်။ ဇန်န၀ါရီလ (၂၃) ရက်နေ့တွင် တဖန် ထပ်မံစကားများကြရာ ကျေးရွာအုပ်ချုပ်ရေးမှူးက ကော်လိမ်ဂျူဟာရ်သည် အီနုစ်၏ မိခင်ဖြစ်သူကို အဓမ္မပြုကျင့်ရန် ကြံစည်ခဲ့သည်ဟု လုပ်ကြံစွပ်စွဲ၍ နယ်ခြားစောင့်ရဲများ ခေါ်လာပြီး လိုက်လံဖမ်းဆီးသဖြင့် ထွက်ပြေး တိမ်းရှောင်နေရကြောင်း ဒေသခံများက ပြောပါသည်။