နောက်ဆုံးသတင်း/ဆောင်းပါးများ

ပြည်နယ်အစိုးရအဖွဲ့မှ ဝန်ကြီးများ၏ NVC အတွက်စည်းရုံးမှုနှင့် ဒေသခံများ၏ တုံ့ပြန်ချက်များ

MYARF
RB News
5.3.2017

မောင်တော ။ ။ ရခိုင်ပြည်နယ်အစိုးရ နယ်/လုံဝန်ကြီး ဗိုလ်မှူးကြီးထိန်လင်း၊ လ.ဝ.က မှ ဦးဝင်းလွင်တို့ ဦးဆောင်သော အဖွဲ့သည် မောင်တောခရိုင်မှ ရိုဟင်ဂျာလူမျိုး ကျေးရွာတာဝန်ခံများ၊ ဘာသာရေးဆရာများကို အစည်းအဝေးခေါ်ယူပြီး NVC နှင့်ပတ်သက်၍ ရှင်းလင်းပြောကြားရာတွင် NVC မယူလျှင် ရိုဟင်ဂျာတို့၏ ဘဝလုံခြုံရေး ရှိတော့မည်မဟုတ်ကြောင်းနှင့် ရိုဟင်ဂျာတို့၏ အခြေခံအခွင့်အရေး မှန်သမျှကို NVC မယူလျှင် အစိုးရမှ ပိတ်ပင်ကန့်သတ်ထားရမည်ဟု အဓိပ္ပာယ် သက်ရောက်စေသော ပြောဆိုမှုများဖြင့် အစည်းအဝေး တက်ရောက်လာသူများကို ခြိမ်းခြောက်ပြောဆိုခဲ့သည်ဟု သတင်းရရှိပါသည်။

မတ်လ (၄) ရက်နေ့၊ နံနက် ၁၀ နာရီအချိန်တွင် နယ်/လုံဝန်ကြီးနှင့်အဖွဲ့သည် မောင်တောမြို့နယ်၊ ဘူးသီးတောင်မြို့နယ်နှင့် ရသေ့တောင်မြို့နယ်တို့ရှိ ကျေးရွာတိုင်းမှ ရိုဟင်ဂျာလူမျိုး ကျေးရွာတာဝန်ခံများနှင့် ကျေးရွာတစ်အုပ်စုမှ ဘာသာရေးဆရာ နှစ်ပါးစီကို မတက်မနေရ ပုံစံဖြင့် အတင်းအကျပ် ဖိတ်ခေါ်ပြီး မောင်တောမြို့နယ် အုပ်ချုပ်ရေးရုံး ခန်းမ၌ အစည်းအဝေးတစ်ရပ် ပြုလုပ်ခဲ့ပါသည်။ အစည်းအဝေးတွင် အထူးသဖြင့် NVC အကြောင်းနှင့် ပတ်သက်၍ ပြောကြားခဲ့သည်ဟု အစည်းအဝေး တက်ရောက်ခဲ့သူ ဘူးသီးတောင်မှ ဒေသခံတစ်ဦးက RB News သို့ပြောသည်။ 

“ကျွန်တော်တို့ကို မ.က.ဖ နဲ့ နယ်ခြားစောင့်ရဲတွေက မသွားမဖြစ် ပုံစံနဲ့ အတင်းအဓမ္မ ခေါ်သွားတာ။ အစည်းအဝေးမှာ အထူးသဖြင့်တော့ NVC အကြောင်းပဲ ပြောတယ်။ NVC ယူပေါ့ဗျာ။ မယူရင် မင်းတို့ပဲ ဒုက္ခရောက်မယ် ဘာညာ ခြိမ်းခြောက်တယ်။" ဟု ဒေသခံတစ်ဦးက ပြောပါသည်။

အစည်းအဝေးတွင် ရခိုင်ပြည်နယ် လ.ဝ.က ဦးစီးမှူး ဦးဝင်းလွင်၊ မောင်တော ခရိုင်ရဲတပ်ဖွဲ့မှူး၊ အမှတ်(၁) နယ်ခြားစောင့်ရဲတပ်ဖွဲ့ ရဲမှူးချုပ် သူရစန်းလွင်နှင့် နယ်/လုံ ဝန်ကြီး ဗိုလ်မှူးကြီးထိန်လင်း တို့က စကားပြောခဲ့ပြီး ၎င်းတို့က NVC အကြောင်းသာ ပြောခဲ့သည်ဟု သိရှိရသည်။ 

နယ်/လုံဝန်ကြီး ဗိုလ်မှူးကြီးထိန်လင်းက “အစိုးရအနေနဲ့ ဒေသတည်ငြိမ်လာအောင် ကြိုးစားနေရတာမှာ ခင်ဗျားတို့ဖက်ကလည်း အစိုးရ ထုတ်ပေးနေတဲ့ NVC ကိုလက်ခံသင့်တယ်။ အကြမ်းဖက်သမားတွေနဲ့ ခြားနားအောင် ခင်ဗျားတို့ အထောက်အထား တစ်ခုအဖြစ် NVC ကိုင်ကြပါ။

NVC ကို အတင်းအဓမ္မထုတ်ပေးမယ်၊ မဖြစ်မ နေယူရမယ်၊ မယူရင် လမ်းပန်းဆက်သွယ်ရေး ပိတ်ဆို့မယ်၊ စီးပွားရေးပိတ်ဆို့မယ် ဆိုပြီး အသံထွက်နေတာတွေက လုံးဝမမှန်ဘူး။ အစိုးရမှာ အဲ့လို အစီစဉ်မရှိဘူး။ ယူချင်ရင်ယူ မယူချင်လည်း ရတယ်” ဟု စည်းရုံးပြောဆိုသွားခဲ့ကြောင်း အစည်းအဝေး တက်ရောက်ခဲ့သူ မောင်တော ဒေသခံတစ်ဦးက ပြောပါသည်။ 

နယ်/လုံဝန်ကြီး၏ စည်းရုံးပြောဆိုသွားမှုနှင့် ပတ်သက်၍ အဆိုပါ မောင်တော ဒေသခံ၏ အမြင်ကို မေးမြန်းကြည့်သည့်အခါ ၎င်းက “ဝန်ကြီး ပြောသွားတဲ့စကားတွေက ရှေ့နောက်မညီဘူးဗျာ။ NVC မကိုင်ရင် အကြမ်းဖက်သမား ဖြစ်သွားမယ့် သဘောနဲ့ ပြောသွားတာ အရမ်းဆိုးတယ်။ NVC ကို အတင်းထုတ်ပေးမှာ မဟုတ်ဘူး၊ NVC ကိစ္စကြောင့် လမ်းပန်းဆက်သွယ်ရေးလည်း မပိတ်ဘူး ဆိုပြီး ပြောဆိုသွားပေမယ့် လက်တွေ့မှာတော့ လူတွေကို ပိတ်လှောင်ထားတာပဲလေ။ တစ်ခုခု လုပ်တာနဲ့ NVC နဲ့ အကျပ်ကိုင်နေတာပဲ။ ငါးဖမ်းတဲ့ လူတွေကို NVC ကိုင်မှ ဖမ်းခွင့်ပြုမယ်တို့လိုပေါ့။ ဝန်ကြီးရဲ့ ပြောစကားနဲ့ လက်တွေ့ လုပ်ရပ်တွေနဲ့ ဆီနဲ့ ရေလို ကွာတယ်။

မောင်တော ဒေသခံတွေကတော့ NVC က သူတို့နဲ့ မဆိုင်ဘူး ဆိုပြီး ခံယူတယ်။ အဲ့တော့ ဘယ်သူ့မှ လက်မခံကြဘူး။ အာဏာပိုင်တွေနဲ့ပေါင်းပြီး မူးယစ်ဆေးဝါးလုပ်နေသူတွေလို တစ်ချို့လူတွေကတော့ အာဏာပိုင်တွေ ပြောတဲ့အတိုင်းပဲ လုပ်မြဲမို့ သူတို့အကြောင်းတော့ ကျနော် မပြောချင်ဘူး” ဟု ရင်ဖွင့်သည်။

အဆိုပါ အစည်းအဝေးတွင် ဝန်ကြီးနှင့်အဖွဲ့က NVC အကြောင်း ရေးထားသည့် စာရွက်များ ဖြန့်ဝေခဲ့ပါသည်။ အဆိုပါ စာရွက်တွင် မည်သည့်အချက်များ ပါဝင်နေသည်ကို ရသေ့တောင်မြို့နယ်မှ အစည်းအဝေးလာတက်သူ တစ်ဦးကို မေးမြန်းကြည့်သောအခါ --

“အဲ့ဒီစာရွက်မှာ ထူးဆန်းတာတစ်ခုက ဘင်္ဂလားစာနဲ့ ရေးထားတာပါပဲ။ မြန်မာနိုင်ငံမှာ ဘင်္ဂလားစာက ရုံးသုံးစာလည်း မဟုတ်ဘူး။ ဒီလို ဘင်္ဂလားစာနဲ့ ရေးတာကို ကြည့်ရင် NVC ပေးခြင်းက ဒီလူတွေ ဘင်္ဂလားဒေ့ရ်ှကနေ ဝင်ရောက်လာတယ်ဆိုပြီး သတ်မှတ်ချင်တာ။ ကျွန်တော်တို့က ဒီနိုင်ငံရဲ့ မူလဘူတဆိုတော့ ဒီ NVC က ကျွန်တော်တို့နဲ့ ဘယ်လိုမှ မပတ်သက်ဘူး။ 

နောက် အဲ့ဒီစာရွက်မှာ ရေးထားတာကလည်း အင်မတန် ဆိုးတယ်ဗျာ။ ခရီးသွားချင်ရင်၊ ငါးဖမ်းချင်ရင်၊ လူမှုစီးပွားကိစ္စများ လုပ်လိုရင် NVC ကိုင်ပါတဲ့။ ဒါက NVC မကိုင်ရင် ဒါတွေ လုပ်ခွင့်မပေးဘူးဆိုပြီး ဗြောင်ပြောနေတာပဲ။ ပြီးတော့ NVC ကိုဆောင်မှပဲ ဘဝအာမခံချက် ရှိမယ်၊ ဘဝလုံခြုံရေးအတွက် အာမခံချက်ရှိမှာတဲ့။ ဒီအချက်တွေက NVC မကိုင်ရင် မင်းတို့ကို သတ်မယ်ဖြတ်မယ် ဆိုတဲ့ သဘောပါပဲ။ 

သူတို့ ဘယ်လိုပင် ခြိမ်းခြောက်ခြိမ်းခြောက် ကျွန်တော်တို့ဖက်တော့ လုံးဝလက်မခံနိုင်ဘူး။ ကျွန်တော်တို့က NVC ကိုင်ရမယ့် အနိမ့်ဆုံးအဆင့် နိုင်ငံသားမဟုတ်ဘူး။" ဟု ပြောသည်။

NVC အကြောင်း ရေးထားသည့် စာရွက်တွင် “NVC မကိုင်ဆောင်သူ နိုင်ငံမဲ့ဟု မှတ်ယူရ” ဟု ရေးထားသည်မှာ မြန်မာနိုင်ငံ၏ တည်ဆဲနိုင်ငံသား ဥပဒေအရလည်း ဆန့်ကျင်နေကြောင်း မောင်တောမှ လူ့အခွင့်အရေးလှုပ်ရှားသူ တစ်ဦးက ဆိုသည်။ ရိုဟင်ဂျာများသည် မြန်မာတစ်နိုင်ငံလုံးတွင် တိုင်းရင်းသား နိုင်ငံသားများကို ထုတ်ပေးခဲ့သည့် အမျိုးသားမှတ်ပုံတင်ကဒ်ကို ကိုင်ဆောင်သူ သို့မဟုတ် ၎င်းတို့၏ သားသမီးများသာ ဖြစ်ကြသဖြင့် NVC မကိုင်ဆောင်၍ နိုင်ငံမဲ့ ဖြစ်မသွားကြောင်းလည်း အဆိုပါ လူ့အခွင့်အရေး လှုပ်ရှားသူက ပြောပါသည်။

အစည်းအဝေးတွင် မောင်တောမြို့နယ်မှ ရှေ့နေဟောင်း ဦးအာမာန်အူလ္လာက “ခင်ဗျားတို့က နိုင်ငံသားစီစစ်နိုင်ဖို့ NVC ထုတ်ပေးတယ် ပြောနေတယ်။ လ.ဝ.က ရုံးရောက်ရင် NVC ထုတ်ပေးတဲ့ အချိန်မှာ နိုင်ငံသားဥပဒေ ၄၇ အရ လက်မှတ်ထိုးခိုင်းတယ်။ အဲ့ဒါက လူတွေကို နိုင်ငံသားပြုခွင့်အဆင့် သတ်မှတ်နေတာဖြစ်တယ်” ဟု မေးခွန်းထုတ်ခဲ့သည်ကိုလည်း ဝန်ကြီးအဖွဲ့က ဖြေဆိုနိုင်ခြင်း မရှိဘဲ သမ္မတ ဦးထင်ကျော် အမိန့်အရ ဆောင်ရွက်နေကြောင်းဖြစ်သည်ဟုသာ ဖြေဆိုခဲ့ပါသည်။

NVC ဖြင့် နိုင်ငံသားစီစစ်နိုင်ရန် လျှောက်နိုင်သည်ဟု ဆိုသော်လည်း လက်တွေ့မှာမူ မြို့နယ် လ.ဝ.က က ငွေပေးနိုင်သူ၏ လျှောက်လွှာကိုသာ လက်ခံနေပြီး ကျန်လျှောက်လွှားများကို လက်ခံနေခြင်း မရှိကြောင်း ဒေသခံများက ပြောပါသည်။ 

“ဒီ NVC က ကာလလည်း အကန့်အသတ်မရှိတော့ ကျနော်တို့ ရိုဟင်ဂျာတွေကို ဒီ NVC နဲ့ပဲ တစ်သက်လုံး နေစေချင်တာသာ ဖြစ်တယ်” ဟု မောင်တောမှ လူ့အခွင့်အရေးလှုပ်ရှားသူ ဦးဝင်းနိုင်က ပြောသည်။

ဒေသခံ ရိုဟင်ဂျာ ပညာတတ် လူငယ်တစ်ဦးက --

“ပွင့်လင့်မြင်သာမှုလည်း မရှိဘူး။ တရားဥပဒေ အတိုင်းလည်း မလုပ်ဘူး။ ဒီတော့ ဒီ NVC ကို ကန့်ကွက်တယ်” ဟု ၎င်း၏အမြင်ကို ပြောပါသည်။ 

“သူတို့ တကယ်လုပ်ရမှာက မြို့နယ်တိုင်းက ရိုဟင်ဂျာ ရပ်မိရပ်ဖတွေ၊ ရိုဟင်ဂျာ နိုင်ငံရေးပါတီက တာဝန်ရှိသူတွေနဲ့ ပြည်ထောင်စုအဆင့် ဆွေးနွေးပြီး အဖြေရှာသင့်တယ်။ အခုက အောက်ခြေက လူတွေကို ခိုင်းနွားလို သဘောထားပြီး လုပ်ချင်တိုင်း လုပ်နေတာကတော့ ဒီမိုကရေစီနဲ့ လူ့အခွင့်အရေးကို ဒီမိုကရေစီ အစိုးရကပဲ မုဒိမ်းကျင့်နေသလို ဖြစ်နေတယ်” ဟု အဆိုပါ ပညာတတ်လူငယ်က သုံးသပ်ပြ ပြောဆိုသည်။

အစည်းအဝေးတွင် ဖြန့်ဝေသည့် စာရွက်များ



Comment ရေးရန်

Rohingya Exodus