မြို့မကညင်တန်း မူလွန်ကျောင်းတွင် ဆရာမက ကျောင်းသူများကို ဖိနပ်ဖြင့်ရိုက်

RB News

28.6.2018

မောင်တော ။ ။ ရခိုင်ပြည်နယ်၊ မောင်တောမြို့နယ် မြို့မကညင်တန်းကျေးရွာရှိ မူလွန်ကျောင်းတွင် ဆရာမက ကျောင်းသူများကို ဖိနပ်ဖြင့် ရိုက်နှက်ခဲ့သည်။ 

ဇွန်လ (၂၇) ရက်နေ့ နံနက် ၉ နာရီအချိန်တွင် မောင်တောမြို့နယ် မြို့မကညင်တန်းကျေးရွာရှိ မူလတန်းလွန်ကျောင်းတွင် ပထမတန်းမှ အတန်းပိုင်ဆရာမက ကျောင်းသား/သူများကို စာရေးခုံပေါ်တွင် ခေါင်းမှောက်၍ မျက်စိမှိတ် ငြိမ်နေရန် ပြောကြားခဲ့ပြီးနောက် ကျောင်းသား/သူများကလည်း ဆရာမမှာကြားသည့်အတိုင်း ငြိမ်နေခဲ့ကြသည်။ ထိုစဉ် ကျောင်းသူ (၃) ဦးက မျက်စိဖွင့်၍ နောက်ဘက်သို့ လှည့်ကြည့်သဖြင့် ဆရာမက အားမနာဟု ဆိုကာ စီးထားသည့် ဖိနပ်ကိုချွတ်၍ ကျောင်းသူငယ် (၃) ၏ နောက်ကျောကို ဖိနပ်ဖြင့် ရိုက်နှက်ခဲ့ကြောင်း ဒေသခံတစ်ဦးက RB News သို့ပြောသည်။ 

အဆိုပါ ကျောင်းသည် ယခင်က မူလတန်းကျောင်း (စံပြ) ဖြစ်ခဲ့ပြီး ယခုအခါ မူလတန်းလွန်ကျောင်း (စံပြ) ဖြစ်လာသည့် ကျောင်းဖြစ်သည်။ 

ယင်းကျောင်းတွင် ပညာသင်ယူနေသည့် ကျောင်းသား/သူများမှာ ရိုဟင်ဂျာကလေးများသာ ဖြစ်ကြသည်။ အချို့ဆရာမများက ကျောင်းသား/သူများနှင့် မိဘများကို “ကုလား” ဟု သုံးနှုန်းခေါ်ဝေါ်၍ ခွဲခြားဆက်ဆံလေ့ရှိသည်။ 

“အခုခေတ် ပညာရေးဥပဒေမှာ စာသင်ခန်းထဲကို ဆရာ/မ တွေ တုတ်တောင် ကိုင်လို့မရဘူး၊ ကလေးတွေကို ရိုက်လို့လည်း မရဘူး။ ဆိုဆုံးမခွင့်သာ ရှိတယ်။ ကျောင်းသား/သူတွေ စည်းကမ်းဖောက်ရင် မိဘတွေကို ခေါ်ပြီး သတိပေးတာ၊ ခံဝန်လက်မှတ်ထိုးခိုင်းတာ၊ ကျောင်းကထုတ်လိုက်တာ စတာတွေသာ လုပ်ခွင့်ရှိတယ်။

“ကျောင်းသားတွေကို တုတ်နဲ့ ရိုက်ခွင့်မရှိတဲ့အချိန်မှာ ဆရာမက ဖိနပ်နဲ့ ရိုက်တာကတော့ လူမျိုးရေးခွဲခြားပြီး တမင်လုပ်တာဖြစ်တယ်” ဟု ဒေသခံတစ်ဦးက ပြောပါသည်။