မောင်တောခရိုင်ရှိ ယာဉ်ထိန်းရဲများက ရိုဟင်ဂျာများကိုသာ ပစ်မှတ်ထား၍ ငွေညှစ်

RB News

8.7.2018

မောင်တော ။ ။ ရခိုင်ပြည်နယ်၊ မောင်တောမြို့နယ်တွင် ယာဉ်ထိန်းရဲများက ရိုဟင်ဂျာများထံမှသာ ငွေညှစ်လျက် ရှိသည်။

မောင်တောမြို့ပေါ်တွင် ဆိုင်ကယ်နှင့် CNG သုံးဘီးကား မောင်းနှင်သော ရိုဟင်ဂျာများကို မိခင်နှင့်ကလေး စောင့်ရှောက်ရေးရုံး၏ အရှေ့ဘက်ရှိ ယာဉ်ထိန်းရဲရုံးရှေ့မှ ဖြတ်သွားလျှင် ရပ်တန့်ခိုင်းပြီး ဆိုင်ကယ် ဦးထုပ်ဆောင်း/မဆောင်း၊ ယာဉ်လိုင်စင်ရှိ/မရှိနှင့် ယာဉ်မောင်းလိုင်စင်ရှိ/မရှိ စစ်ဆေးသည်။ 

ဆိုင်ကယ်ဦးထုပ် ဆောင်းရန် ပျက်ကွက်သူများထံမှ ငွေကျပ် ၃ သောင်းမှ ၆ သောင်းထိ၊ ယာဉ်မောင်းလိုင်စင် မရှိပါက ငွေကျပ် ၁ သိန်းမှ ၂ သိန်းထိ ညှစ်ယူနေသည်ဟု ဒေသခံများက RB News သို့ပြောသည်။ အချို့က ယာဉ်လိုင်စင်၊ ယာဉ်မောင်းလိုင်စင်များ မပျက်စီးသွားအောင် မူရင်းကို အိမ်တွင် သိမ်းထားပြီး မိတ္တူဆောင်ထားလေ့ရှိသည်။ ထိုသို့ မိတ္တူဆောင်ထားသူများကိုလည်း မိတ္တူနှင့် မောင်းနှင်ခွင့်မရှိဟု ဆိုကာ ဆိုင်ကယ်ကို ထိန်းသိမ်းထားပြီး မူရင်းကို ယူလာပြခိုင်းသည်။ မူရင်းယူလာလျှင်လည်း စည်းကမ်းလိုက်နာခြင်း မရှိဟုဆိုကာ ငွေကျပ် ၃ သောင်းမှ ၇ သောင်းထိ ညှစ်ယူလျက်ရှိသည်။ 

ယာဉ်လိုင်စင်မရှိသူများကို တရားစွဲဆို၍ တရားရုံးက လိုင်စင်မဲ့ယာဉ်များကို အပြီးပိုင်သိမ်းဆည်းသည်ဟု ဒေသခံများက ဆိုသည်။

ယာဉ်မောင်းလိုင်စင်မရှိသူနှင့် ဦးထုပ်မဆောင်းဘဲ မောင်းနှင်သူများကိုလည်း တစ်ခါတစ်ရံ တရားစွဲဆို၍ တရားရုံးမှ ငွေဒဏ်ချမှတ်ကြောင်း သိရသည်။

ယာဉ်ထိန်းရဲများ၏ စည်းကမ်းများသည် ရိုဟင်ဂျာများအတွက်သာ ဖြစ်ပြီး၊ ဗုဒ္ဓဘာသာဝင် အခြားလူမျိုးများ အတွက် အကျုံးဝင်ခြင်းမရှိဟု ဒေသခံများက ဝေဖန်ပြောဆိုသည်။ ဗုဒ္ဓဘာသာဝင်များ ယာဉ်မောင်းလိုင်စင်မရှိ၊ ဦးထုပ်မဆောင်းဘဲ မောင်းနှင်သွားလျှင်လည်း ယာဉ်ထိန်းရဲများက ၎င်းတို့ကို စစ်ဆေးခြင်း၊ ဖမ်းဆီးခြင်း၊ ငွေညှစ်ခြင်း လုံးဝမရှိဘဲ၊ စည်းမဲ့ကမ်းမဲ့ မောင်းနှင်လျှင်ပင် ရပ်တန့်ခိုင်းခြင်း မရှိဟု ဒေသခံများက ပြောပါသည်။ 

အလားတူ ဘူးသီးတောင်မြို့နယ်တွင်လည်း ယာဉ်ထိန်းရဲများက ရိုဟင်ဂျာများကိုသာ စစ်ဆေး၍ ငွေညှစ်လျက်ရှိပြီး၊ ဗုဒ္ဓဘာသာဝင်များဆိုလျှင် စစ်ဆေးခံရန် မလိုအပ်ဟု ဘူးသီးတောင်မြို့ခံ တစ်ဦးက ပြောသည်။ 

ယာဉ်ထိန်းရဲများ၏ လုပ်ရပ်သည် လူမျိုး၊ ဘာသာခွဲခြား ပစ်မှတ်ထား၍ ညှဉ်းပန်းနှိပ်စက်မှုတစ်မျိုး ဖြစ်သည်ဟု ဒေသခံများက ဆိုသည်။