ဘူးသီးတောင် ကျောက်ဖြူသားသေကံ တာဝန်ခံက အမျိုးသမီးများ ထောက်ပံ့ကြေး ရရှိရန် စာရင်းပေးသွင်းရမည်ဟု ဆိုကာ ငွေကောက်ခံ

ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ် ကျောက်ဖြူသားသေကံ ကျေးရွာအုပ်စုမှ ကျေးရွာတာဝန်ခံက ကိုယ်ဝန်ဆောင်အမျိုးသမီးများကို ထောက်ပံ့ကြေးရရှိရန် ငွေသွင်းရမည်ဟု ဆိုကာ ငွေကျပ် တစ်သောင်းစီ ကောက်ခံခဲ့သည်။ 

သြဂုတ်လ (၁၂) ရက်နေ့က ကျောက်ဖြူသားသေကံ ကျေးရွာအုပ်စုမှ ကျေးရွာတာဝန်ခံ ဦးအဗ်ဒူရ်ရော်ဟိမ်း (ဘ) ဦးအဗ်ဒူရှဖီ (အသက် ၃၅ နှစ်) သည် ရာအိမ်မှူး ယူဆုဖ် (ဘ) ဦးမိုဟာမတ်ဟာရှိမ်း (အသက် ၂၆ နှစ်) ကို သေကံရွာရှိ ကိုယ်ဝန်ဆောင် အမျိုးသမီးများထံမှ တစ်ဦးလျှင် ငွေကျပ် တစ်သောင်းစီ ကောက်ခံခိုင်းခဲ့ကြောင်း ဒေသခံများက RB News သို့ပြောသည်။ 

ကိုယ်ဝန်ဆောင်နှင့် နို့တိုက်မိခင်များအတွက် ထောက်ပံ့ကြေးများကို ပြည်နယ်အထွေထွေ အုပ်ချုပ်ရေးဦးစီးဌာနမှ မြို့နယ်အထွေထွေ အုပ်ချုပ်ရေးဦးစီးဌာနသို့ ချပေးပြီး၊ မြို့နယ်မှ ရပ်ကွက်/ကျေးရွာ အုပ်ချုပ်ရေးမှူးများ တဆင့် ထုတ်ပေးလျက် ရှိရာ ယခင်က နှစ်ကြိမ် ထုတ်ပေးခဲ့ပြီး ဖြစ်သည်။ ထိုသို့ ပေးရာတွင်လည်း အဆိုပါ ကျေးရွာတာဝန်ခံနှင့် ရာအိမ်မှူးတို့ ပူးပေါင်း၍ ရွာရှိ ထောက်ပံ့ကြေးငွေ ရရှိခဲ့သော အမျိုးသမီးများကို အပြည့်အ၀ မပေးဘဲ ငွေကျပ် နှစ်သောင်းကျော်စီ ဖြတ်ယူခဲ့ကြောင်း၊ ယခုလည်း ထောက်ပံ့ကြေး ရရှိနိုင်ရန် အတွက် စာရင်းပေးသွင်းရမည်ဟု ဆိုကာ တစ်ဦးချင်းစီမှ ငွေကျပ် တစ်သောင်းစီ ကောက်ခံခဲ့ခြင်း ဖြစ်သည်။ 

ထောက်ပံ့ကြေး ရရှိနိုင်ရန် အတွက် ရပ်ကွက်/ကျေးရွာ အုပ်ချုပ်ရေးမှူးရုံးသို့ အိမ်ထောင်စု လူဦးရေစာရင်း၊ မှတ်ပုံတင်၊ ကလေးအား ကာကွယ်ဆေး တိုက်ကျွေးသည့် လက်မှတ် တို့ဖြင့် စာရင်းပေးသွင်းရသည်။ ယခုအခါ ကလေးမွေးစာရင်းပါ တင်ပြရန် တောင်းခံနေသည်ဟု သိရသည်။ အဆိုပါစာရင်းများကို ကျေးရွာမှ မြို့နယ်ရုံး၊ မြို့နယ်မှ ပြည်နယ်ရုံးသို့ ပေးပို့ရပြီး ပြည်နယ်ရုံးမှ စိစစ်ပြီး စည်းမျဉ်းနှင့် မကိုက်ညီသူများကို ဖယ်ကာ၊ ထောက်ပံ့ကြေး ရရှိမည့်သူများ၏ စာရင်းကို မြို့နယ်သို့ ပြန်လည် ချပေးပြီးနောက် မြို့နယ်မှ ရပ်ကွက်/ကျေးရွာ အုပ်ချုပ်ရေးမှူးများမှ တဆင့် ထုတ်ပေးခြင်း ဖြစ်သည်။ 

ကလေး အသက်တစ်လ မှ ၁၈ လ အထိ ကလေးများကို နို့တိုက်နေသည့် မိခင်များကို ငွေကျပ် ၉ သောင်း၊ ကိုယ်ဝန်ဆောင်များကို ပထမ ၃ လ၊ ဒုတိယ ၃ လနှင့် တတိယ ၃ လ ခွဲကာ ၆ သောင်းမှ ၇ သောင်းခွဲထိ ပေးကြောင်း သိရသည်။