လိပ်ရ အခြေစိုက် BGP တပ်ဖွဲ့ဝင်များက မတရား ဖမ်းဆီး ငွေညှစ်၊ လုယက်

Rohingya Eye
RB News
21.8.2014

မောင်တော ။ ။ ရခိုင်ပြည်နယ်၊ မောင်တောမြို့နယ် မြောက်ပိုင်း ကျောက်တောင်း ကျေးရွာ အုပ်စု၊ ရွာသစ်ရွာသို့ နယ်ခြားစောင့် ရဲတပ်ဖွဲ့ဝင်များ လာရောက်၍ ဒေသခံ ရွာသား များကို မတရား ဖမ်းဆီးခြင်း၊ ငွေညှစ်ခြင်းနှင့် လုယက်ခြင်းများ ပြုလုပ် ခဲ့ကြောင်း သတင်း ရရှိပါသည်။

သြဂုတ်လ (၁၉) ရက်နေ့ နေ့လည် ၃း၃၀ နာရီအချိန်တွင် မောင်တောမြို့နယ် မြောက်ပိုင်း လိပ်ရ ကျေးရွာ အခြေစိုက် နယ်မြေ (၄) မှ နယ်ခြားစောင့် ရဲတပ်ဖွဲ့ဝင် (၁၃) ဦးတို့သည် ကျောက်တောင်း (ရှိတ်ခါလီ) ကျေးရွာ အုပ်စု၊ ရွာသစ်ရွာသို့ ရောက်ရှိလာပြီး၊ ကိုဟာရှိမ်း (ဘ) ဦးဆော်ယာဒ်ဆာလမ် (အသက် ၂၈ နှစ်) နှင့် ကိုဆော်လမ် (ဘ) ဦးဘာဆာမျာ (အသက် ၂၅ နှစ်) တို့ကို တဖက်နိုင်ငံမှ ငွေများ ကိုင်ဆောင်သည်ဟု မဟုတ်မမှန် စွပ်စွဲပြီး မတရား သဖြင့် ဖမ်းဆီး၍ လိပ်ရကျေးရွာရှိ နယ်မြေ စခန်းသို့ ခေါ်ဆောင် သွားကြောင်း ဒေသခံ တစ်ဦးက RB News သို့ပြောပါသည်။

အလားတူ ကျောက်တောင်း ကျေးရွာ အုပ်စု၊ အလယ်ရွာရှိ ကိုအဘူဆော်ယာဒ် (ဘ) ဦးရော်ရှိတ်အာမတ် (အသက် ၂၅ နှစ်) ၏ နေအိမ်သို့ ၀င်ရောက် ရှာဖွေပြီး၊ တဖက်နိုင်ငံမှ ငွေများ တွေ့ရှိသည်ဟု ဆိုကာ မဟုတ်မမှန် စွပ်စွဲ၍ ဖမ်းဆီးပြီးနောက် ထိုအိမ်ထဲတွင်ပင် ငွေကျပ် ၈၁၀၀၀/- ယူ၍ ပြန်လည် လွှတ်ပေးခဲ့ကြောင်း အဆိုပါ ဒေသခံက ပြောပါသည်။

ထို့နောက် နယ်ခြားစောင့် ရဲတပ်ဖွဲ့ဝင် များသည် ရွာသစ်ရွာရှိ ဇိုတ်ဟူဆောင်း (ဘ) ဦးရှာဟဲမျာ (အသက် ၁၈ နှစ်) ၏ ကွမ်းယာဆိုင်သို့ ၀င်ရောက်၍ ငွေကျပ် ၇၀၀၀/- တန်ဖိုးရှိ ဆေးလိပ်နှင့် ကွမ်းများကို လုယက် ယူဆောင် သွားခဲ့သည်။

အဆိုပါ နယ်ခြားစောင့် ရဲတပ်ဖွဲ့ဝင် ၁၃ ဦးကို ဦးဆောင်သူမှာ ဒု-ရဲအုပ် တစ်ဦး ဖြစ်ပြီး၊ နယ်မြေ (၄) သို့ လွန်ခဲ့သည့် တစ်လခန့်က ရောက်ရှိလာသူ ဖြစ်သည်။ ရောက်ရှိလာသည့် နေ့မှစ၍ ကျေးရွာများ အတွင်းသို့ ၀င်ရောက်၍ ဒေသခံ ရွာသားများကို မဟုတ်မမှန် စွပ်စွဲ၍ ဖမ်းဆီးခြင်း၊ ငွေညှစ်ခြင်းနှင့် လုယက်ခြင်း များကို နေ့စဉ် အဆက် မပြတ် ပြုလုပ်လျက် ရှိသည်ကို နယ်မြေမှူးနှင့် အထက် အရာရှိ များက သိရှိသော်လည်း တားဆီး အရေးယူ ဆောင်ရွက်ခြင်း မရှိကြောင်း ဒေသခံများက ပြောပါသည်။