ပွင့်ဖြူချောင်းနှင့် ကျားခေါင်းတောင်ရှိ မူလွန် ကျောင်းများတွင် အစိုးရခန့် ဆရာ/မ များ စာသင်ကြား မပေး

မောင်တော ။ ။ ရခိုင်ပြည်နယ်၊ မောင်တော မြို့နယ် မြောက်ပိုင်း၊ ပွင့်ဖြူချောင်း ကျေးရွာရှိ အစိုးရ မူလတန်း လွန်ကျောင်းတွင် ရိုဟင်ဂျာ ကျောင်း/သူ ၆၀၀ ခန့် ရှိပြီး အစိုးရခန့် ဆရာမ (၃) ဦးနှင့် ရွာမှ ခန့်ထားသည့် ဆရာ (၅) ဦး ရှိသည်။ ကျောင်းအုပ် ဆရာကြီးမှာ ဦးသန့်ဇင်ဦး ဖြစ်သည်။ အဆိုပါ ကျောင်း၏ ကျောင်းအုပ်ကြီးနှင့် ဆရာမ များသည် တစ်ပတ်တွင် တစ်ကြိမ်သာ ကျောင်းသို့ လာရောက်လေ့ ရှိပြီး ရွာမှ ခန့်ထားသည့် ဆရာများဖြင့် ကျောင်းတွင်း လည်ပတ်ခြင်းကိုသာ ပြုလုပ်လျက် ရှိသည်ဟု ဒေသခံများက RB News သို့ပြောသည်။ 

လွန်ခဲ့သည့် စာသင်နှစ် စာမေးပွဲတွင် ကျရှုံးခဲ့သော စတုတ္တတန်း ကျောင်း ၂၅၀ ဦးထံမှ တစ်ဦးလျှင် ငွေ ၁ ထောင်မှ ၅ ထောင် ထိယူ၍ ပဉ္စမတန်းသို့ တက်ရောက်ခွင့် ပြုခဲ့သည်။ ငွေရေးကြေး အဆင်မပြေမှုဖြင့် ပညာသင်ကြားမှုကို နှစ်နှစ်ကြာ ရပ်ဆိုင်း၍ ယခုနှစ်တွင် ကျောင်းပြန်တက်နိုင်ရန် ကျောင်းအပ်ရာတွင် ကျောင်းအုပ်ကြီးက ငွေကျပ် ၅ သောင်းစီ တောင်းခံ နေသဖြင့် အဆိုပါ ငွေကြေး မတတ်နိုင်သူများ၏ သားသမီးများကို ယခုအချိန်ထိ ကျောင်းအပ်နိုင်ခြင်း မရှိကြောင်း ဒေသခံများက ပြောပါသည်။ 

ငွေကျပ် ၅ သောင်းစီ မပေးနိုင်သဖြင့် ကျောင်းမအပ်နိုင်သည့် ကျောင်းသား များမှာ -- 

(၁) မာမတ်တော်ကီ (ဘ) ဦးမာမတ်ဆူဖိတ် -- တတိယတန်း တက်ရန်

(၂) အေကေရာမ် (ဘ) ဦးအဒူရှကူရ် -- ပဉ္စမတန်း တက်ရန်

(၃) ဖေရူဒူစ် (ဘ) ဦးမာမတ်ဆီဒိခ် -- ပဉ္စမတန်း တက်ရန် -- တို့ဖြစ်သည်။ 

ရွာမှ ခန့်ထားသည့် ဆရာတစ်ဦး ဖြစ်သူ ဦးရှောမ်ရှု (ဘ) ဦးမော်ဂုလ်အာမတ် (အသက် ၃၅ နှစ်) က ကျောင်းပြောင်းရန် အတွက် ကျောင်းပြောင်း လက်မှတ် ယူလျှင် ငွေကျပ် တစ်သိန်း ပေးရမည်ဟု ကျောင်းအုပ်ကြီးက ပြောဆိုကြောင်း ငွေကျပ် ၅ သောင်းကြောင့် ကျောင်းမအပ်နိုင်သည့် မိဘများကို ပြောဆိုခဲ့ကြောင်း သိရသည်။ 

မောင်တော မြို့နယ် မြောက်ပိုင်း ကျားခေါင်းတောင် ကျေးရွာမှ ကျောင်းသား/သူ ၅၀၀ ခန့် ရှိသည့် မူလတန်း လွန်ကျောင်းတွင်လည်း အစိုးရခန့် ဆရာ/မ ၅ ဦး နှင့် ရွာမှ ခန့်ထားသည့် ဆရာ/မ ၅ ဦး ရှိပြီး၊ အစိုးရခန့် ဆရာ/မ များမှာ တစ်ပတ်လျှင် တစ်ကြိမ်သာ ကျောင်းသို့ လာရောက်သောကြောင့် ရွာမှ ခန့်ထားသည့် ဆရာ/မ များကသာ စာသင်ကြား၍ ကျောင်းလည်ပတ်လျက် ရှိသည်။

ကျေးရွာများရှိ ကျောင်းများတွင် မြို့နယ် ပညာရေးမှူး၏ ညွန်ကြားချက်ဖြင့် ရွာခန့် ဆရာများ အကန့်အသတ်ဖြင့် ခန့်ထားခဲ့ရသည်။ အစိုးရ ဆရာ/မ များ ကျောင်းသို့ ပုံမှန် လာရောက်ခြင်း မရှိသည့် အပြင် ရွာခန့် ဆရာများကိုလည်း အကန့်အသတ်ဖြင့် ထားရသောကြောင့် ကျောင်းသား/သူ များ၏ ပညာရေး အခြေအနေမှာ ဆိုးရွားလျက် ရှိနေသည်ဟု ဒေသခံများက RB News သို့ပြောပါသည်။ 

အမည်မဖော်လိုသော ဆရာမ တစ်ဦးက “နယ်မှာ တာဝန်ကျတဲ့ ဆရာ/မ တွေကို ကျောင်းပုံမှန် သွားဖို့ ညွန်ကြား ထားသလို၊ ပုံမှန် မသွားတဲ့ ဆရာ/မ တွေကို အရေးယူမယ်လို့လည်း ပညာရေးမှူးက စာထုတ်ထားတာ ရှိပါတယ်။ ဒါပေမယ့် ကျောင်းပုံမှန် မတက်တာကို ပညာရေးမှူးက ကောင်းကောင်း သိတယ်။ အရေးယူမှာ မဟုတ်ဘူး။ တကယ်လို့ ရခိုင်ကျောင်းသား တွေချည်း သင်တဲ့ ကျောင်းမှာ ပုံမှန်မသွားဘူးဆိုရင် အရေးယူကောင်း ယူနိုင်တယ်” ဟု ပြောပါသည်။ 

ရိုဟင်ဂျာ အငြိမ်းစား ကျောင်းဆရာ တစ်ဦးက “မောင်တော မြို့ရဲ့ ပညာရေး စနစ်က အစိုးရ ဆရာ/မတွေ ကျောင်းကို ပုံမှန် မတက်ဘဲ အိမ်မှာ နေပြီး နိုင်ငံတော် လစာ စားနိုင်တဲ့ ပညာရေး စနစ်ဖြစ်ပြီး၊ ရွာခန့် ဆရာတွေ လုံလုံလောက်လောက် ထားဖို့ မပေးတာက ပညာရေး နိမ့်ကျသွားအောင် တမင်လုပ်နေတာ ဖြစ်ပါတယ်။ ပညာရေး ၀န်ကြီးဌာနက လာရောက်ပြီး သေချာ စုံစမ်း အရေးယူသင့်တယ်” ဟုပြောသည်။