ကံပူး ကျေးရွာ အုပ်ချုပ်ရေးမှူးနှင့် အဖွဲ့က နယ်ခြားစောင့် ရဲများနှင့် ပူးပေါင်း၍ အပြစ်မဲ့ များထံမှ ငွေညှစ်

မောင်တော ။ ။ ရခိုင်ပြည်နယ်၊ မောင်တော မြို့နယ် တောင်ပိုင်း ကံပူး ကျေးရွာ အုပ်ချုပ်ရေးမှူး ဦးဆော်ယာဒ်အာလောမ် နှင့် ၎င်း၏ တပည့်များ ဖြစ်သူ ဦးရှကူရ်၊ ဦးမော်တော်လောဖ၊ ဦးဇီယာဘုလ္လာ၊ ဦးရှောမ်ရှုအာလောမ် တို့ပူးပေါင်း၍ စက်တင်ဘာလ (၉) ရက်နေ့ နံနက် ၂ နာရီ အချိန်တွင် မောရ၀တီ န.တ.လ ရွာနှင့် ဥဒေါင်း ကျေးရွာ ကြားရှိ နယ်ခြားစောင့် ရဲတပ်ဖွဲ့ စခန်းမှ နယ်ခြားစောင့်ရဲ နှစ်ဦးနှင့် အတူ ကံပူးကျေးရွာမှ မော်လ၀ီ မာမတ်ဇူဘိုင်ရ် (ဘ) ဦးရှော်ဘိရောင် (ဘော်လီ)၊ ဦးမာမတ်အီနုစ် (မော်လ၀ီ ဟိုင်ဘူလ္လာ၏ တူ) နှင့် ဦးရှောမ်ရှု တို့၏ နေအိမ်များကို ၀င်ရောက် စစ်ဆေးခဲ့သည်။ 

ထိုသို့ စစ်ဆေးရာတွင် တရားမ၀င် ပစ္စည်း တစ်စုံတစ်ရာ မတွေ့ရှိသော်လည်း ဘင်္ဂလားဖုန်းများ တွေ့ရှိခဲ့သည်ဟု လုပ်ကြံ စွပ်စွဲ၍ အဆိုပါ ရွာသား (၃) ဦးလုံးကို ဖမ်းဆီးပြီး ကျေးရွာ အုပ်ချုပ်ရေးမှူး ရုံးအဖြစ် အသုံးပြုနေသည့် ဆယ်အိမ်မှူး ဦးအစ္စလာမ်၏ နေအိမ်သို့ ခေါ်ဆောင်သွားကာ ကြိုးများ ချည်နှောင်ထားခဲ့သည်။ ထို့နောက် နယ်ခြားစောင့်ရဲ နှစ်ဦး ပြန်လည် ထွက်ခွာသွားခဲ့သည်။ 

နံနက် (၈) နာရီခန့် အချိန်တွင် ကျေးရွာ အုပ်ချုပ်ရေးမှူး ဦးဆော်ယာဒ်အာလောမ်က ဖမ်းဆီးထားသူ ဦးမာမတ်အီနုစ်နှင့် ဦးရှောမ်ရှု တို့ထံမှ ငွေကျပ် (၇) သိန်းစီ ညှစ်ယူ၍ ပြန်လည် လွှတ်ပေးခဲ့သော်လည်း မော်လ၀ီ မာမတ်ဇူဘိုင်ရ်က ငွေကျပ် (၇) သိန်း မပေးနိုင်သဖြင့် ဆက်လက်၍ ချုပ်နှောင် ထားခဲ့သည်။ ညနေ နေ၀င်ချိန်တွင် မော်လ၀ီ ဇူဘိုင်ရ်၏ မိသားစုက ငွေကျပ် (၇) သိန်းယူလာပေးမှသာ ပြန်လည် လွှတ်ပေးခဲ့ကြောင်း ဒေသခံ တစ်ဦးက RB News သို့ပြောပါသည်။ 

ကျေးရွာ အုပ်ချုပ်ရေးမှူးသည် ရွာသား (၃) ဦးထံမှ ညှစ်ယူထားသည့် ငွေကျပ် ၂၁ သိန်းမှ တစ်ဝက်ကို နယ်ခြားစောင့်ရဲ နှစ်ဦးကို ဝေစုခွဲ ပေးခဲ့ကြောင်း အဆိုပါ ဒေသခံက ပြောပါသည်။ ထိုသို့ ရွာသားများကို မတရားသဖြင့် ဖမ်းဆီး၍ တိရစ္ဆာန် သဖွယ် ကြိုးဖြင့် ချည်နှောင်၍ ငွေညှစ်ရခြင်းမှာ အဆိုပါ ရွာသား (၃) ဦးနှင့် အုပ်ချုပ်ရေးမှူး တို့အကြား ရန်ငြိုး ရှိခြင်းကြောင့် ဖြစ်သည်ဟု ဆိုသည်။ အဆိုပါ ကျေးရွာ အုပ်ချုပ်ရေးမှူးသည် ၎င်း၏ ဆွေမျိုးသားချင်း များမှ အပ ကျန်ရွာသားများ ထံမှ မကြာခဏ ထိုသို့ မတရားသဖြင့် ငွေညှစ်လေ့ ရှိသည်ဟု ဒေသခံများက ပြောပါသည်။ 

ယခုကဲ့သို့ မတရားသဖြင့် ဖမ်းဆီး၍ ငွေညှစ်နေခြင်းအား အထက် အာဏာပိုင်များက အရေးယူ ဟန့်တားခြင်း မပြုလုပ်ပါက ရွာသားများနှင့် အုပ်ချုပ်ရေးမှူး အကြား မလိုလားအပ်သည့် ပြဿနာများ ဖြစ်လာလိမ့်မည်ဟု ဒေသခံများက ပြောပါသည်။