နောက်ဆုံးသတင်း/ဆောင်းပါးများ

နွားရုံတောင် ကျေးရွာ အုပ်ချုပ်ရေးမှူးနှင့် နယ်ခြားစောင့်ရဲများ ပူးပေါင်း၍ ရွာသားများကို လုပ်ကြံ၍ ငွေညှစ်



MYARF
RB News
13.9.2015

မောင်တော ။ ။ ရခိုင်ပြည်နယ်၊ မောင်တော မြို့နယ် မြောက်ပိုင်း နွားရုံတောင် ကျေးရွာ အုပ်ချုပ်ရေးမှူး ဦးချစ်မောင်သည် စက်တင်ဘာလ (၁၀) ရက်နေ့ ည ၉း၁၅ နာရီ အချိန်တွင် ၎င်းကျေးရွာ အခြေစိုက် နယ်ခြားစောင့် ရဲတပ်ဖွဲ့ စခန်းမှ နယ်ခြားစောင့်ရဲ (၄) ဦးနှင့် အတူ ဆယ်အိမ်မှူး ဦးကော်ဘိရ်နှင့် အခြား ဆယ်အိမ်မှူး တစ်ဦးတို့ကို ခေါ်ယူပြီး ဒေသခံ ရိုဟင်ဂျာ အချို့၏ နေအိမ်များကို ၀င်ရောက် စစ်ဆေးခဲ့သည်။ 

စစ်ဆေးခဲ့သည့် အိမ်များတွင် တရားမ၀င် ပစ္စည်း တစ်စုံတစ်ရာ မတွေ့ရှိခဲ့သော်လည်း ဦးဘော်ဒူယာနှင့် ဦးဇော်ရိုးဆောင် တို့၏ နေအိမ်များတွင် မည်သည့် ဆင်းမ်ကဒ်မှ မပါသည့် ဟန်းဆက် တစ်လုံးစီ တွေ့ရှိခဲ့သည်။ ကျေးရွာ အုပ်ချုပ်ရေးမှူးနှင့် အဖွဲ့က အဆိုပါ ဟန်းဆက်များတွင် ဘင်္ဂလား ဆင်းမ်ကဒ်များ တွေ့ရှိခဲ့သည်ဟု လုပ်ကြံ စွပ်စွဲ၍ အိမ်ရှင် နှစ်ဦးကို ဖမ်းဆီးပြီး ဦးဘော်ဒူယာ ထံမှ ငွေကျပ် ၅ သိန်းနှင့် ဦးဇော်ရိုးဆောင် ထံမှလည်း ငွေညှစ်ခဲ့ကြောင်း ဒေသခံ တစ်ဦးက RB News သို့ပြောပါသည်။ 

စစ်ဆေးခံခဲ့ရသည့် အိမ်များမှာ - ဦးအနိုဝါရ်၊ ဦးဆီးရာဇ်၊ ဦးမော်တူ၊ ဦးဘော်ဒူယာ၊ ဦးဇော်ရိုးဆောင်၊ ဦးမာမတ်နှင့် ဦးကော်ဘိရ်အာမတ် တို့၏ နေအိမ်များ ဖြစ်သည်။ စစ်ဆေးရာတွင် နယ်ခြားစောင့် ရဲများနှင့် ကျေးရွာ အုပ်ချုပ်ရေးမှူး ဦးချစ်မောင် တို့က နေအိမ် အတွင်းရှိ အမျိုးသမီးများ၏ ခန္ဓာကိုယ်များကို ကိုင်တွယ် စစ်ဆေးခဲ့သည်ဟု ဒေသခံများက ပြောပါသည်။ 

အဆိုပါ နယ်ခြားစောင့်ရဲ များနှင့် ကျေးရွာ အုပ်ချုပ်ရေးမှူး ဦးချစ်မောင် တို့ပူးပေါင်း၍ မကြာခဏ ဒေသခံ ရိုဟင်ဂျာများ၏ နေအိမ်များ စစ်ဆေး၍ လုပ်ကြံ စွပ်စွဲမှုများ ပြုလုပ်ပြီး ငွေညှစ်လေ့ ရှိသည်ဟု ဒေသခံများက ဆိုသည်။

Comment ရေးရန်

Rohingya Exodus