လိပ်ရကျေးရွာ အခြေစိုက် ရဲမှူးက ဒေသခံများ ထံမှ ငွေညှစ်၊ ငွေထပ်ညှစ်ရန် စီမံကိန်းများ ချမှတ်ထား

10.9.2015

တောင်ပြိုလက်ဝဲ ။ ။ ရခိုင်ပြည်နယ်၊ မောင်တောခရိုင် မြောက်ပိုင်း၊ တောင်ပြိုလက်ဝဲမြို့ လိပ်ရ ကျေးရွာ အခြေစိုက် နယ်ခြားစောင့် ရဲတပ်ဖွဲ့သို့ အသစ် ပြောင်းရွှေ့လာသော တာဝန်ခံ ရဲမှူးသည် ယခင် န.စ.က လက်ထက်က ဒေသခံ ပြည်သူများကို ရက်စက်ခဲ့သည့် အမှုပွဲစားများ ဖြစ်သည့် လိပ်ရကျေးရွာမှ အာယုပ် (ဘ) ဦးကာဆိမ်းနှင့် မောင်မောင် (ဘ) ဦးဘာသာမျာ နှင့် ကျောက်ချောင်း ကျေးရွာမှ အာတိတ်ကာမာလ် (ခ) မောင်မောင်စိုး (ဘ) ဦးအဒူဆူဗာန် တို့ကို လက်ကိုင်တုတ်များ အဖြစ် အသုံးချကာ ရှောင်တခင် စစ်ဆေးခြင်း ခေါင်းစဉ်တပ်ကာ အနီးအနားရှိ ကျေးရွာများသို့ ၀င်ရောက်၍ စစ်ဆေးရန် ကြိုတင် စီမံကိန်း ရေးဆွဲခဲ့သည်။ ၀ါယာကြိုး တစ်ပင် တွေ့လျှင် ငွေကျပ် နှစ်သိန်း၊ မိုဘိုင်းဖုန်း အားသွင်းကြိုး တွေ့လျှင် ငွေကျပ် သုံးသိန်း၊ မိုဘိုင်းဖုန်း အပျက်၊ အကောင်း တွေ့လျှင် ဖြစ်စေ၊ မတွေ့လျှင် ၎င်းတို့ ယူဆောင် လာသည့် ဖုန်းဖြင့် အကွက်ဆင် ဖန်တီးကာ ငွေညှစ်ရန် စီစဉ်ခဲ့ကြောင်း အဆိုပါ ရဲမှူးနှင့် နီးစပ်သူ တစ်ဦးထံမှ စုံစမ်းသိရှိရသည်။ 

အဆိုပါ ရဲမှူးသည် ၎င်း၏ စီမံချက် အတိုင်း လိပ်ရ ကျေးရွာအုပ်စု၊ အလယ်ရွာမှ ဦးနူရ်မုစ်တာဖာ (ဘ) ဦးမာဆောင်းကို နေအိမ်မှ သြဂုတ်လ (၃၀) ရက်နေ့ ညပိုင်းတွင် ဖမ်းဆီး ခေါ်ဆောင် သွားကာ ငွေကျပ် ၅ သိန်း ညှစ်ယူခဲ့သည့် အပြင် လူမဆန်စွာ ရိုက်နှက်၍ ခံဝန် လက်မှတ်ထိုး ခိုင်းပြီးမှ ပြန်လည် လွှတ်ပေးခဲ့သည်။

စက်တင်ဘာလ (၈) ရက်နေ့တွင် ကျောက်ချောင်း ကျေးရွာအုပ်စု၊ ဂုံးနားရွာမှ ဦးကာမာလ်အာမတ် (ဘ) ဦးဆော်ယာဒ် အား မဟုတ်မမှန် လုပ်ကြံ စွပ်စွဲမှုများ ပြုလုပ်ပြီး ငွေကျပ် သုံးသိန်း ညှစ်ယူခဲ့ကြောင်း ဒေသခံ တစ်ဦးက RB News သို့ပြောပါသည်။ 

ဆက်လက်၍ ရေတွင်းပြင်၊ ဇီးပင်ချောင်း၊ ကျွန်းပေါက်ပြုစုနှင့် ကျွန်းပေါက်ဆင်အိုး ကျေးရွာအုပ်စု များသို့ ကွင်းဆင်း၍ ဒေသခံများအား မဟုတ်မမှန် လုပ်ကြံ စွပ်စွဲမှုများ ပြုလုပ်ပြီး ငွေညှစ်ရန် စီမံကိန်း ရေးဆွဲ ထားကြောင်း သိရှိရသည်။ 

ဒေသခံများက ယခုကဲ့သို့ မင်းမဲ့စရိုက် ဆန်ဆန် ပြုလုပ်နေခြင်းများကို ပြည်ထောင်စု အစိုးရမှ အမြန်ဆုံး တားဆီး ဟန့်တား အရေးယူ ပေးရန် လိုလားကြောင်း၊ အကယ်၍ ယခုကဲ့သို့ ဆက်လက် ပြုလုပ်နေမည် ဆိုပါက အဆိုပါ ရဲမှူးနှင့် ဒေသခံများ အကြား ထိပ်တိုက် ပြဿနာများ ဖြစ်ပေါ်လာနိုင်သည်ဟု ဆိုသည်။