နောက်ဆုံးသတင်း/ဆောင်းပါးများ

မောင်တော မောင်နှမကျေးရွာမှ ဗလီဝတ်ကျောင်းတော် နှစ်လုံးကို နယ်ခြားစောင့်ရဲများက အကြောင်းမဲ့ ၀င်ရောက်စစ်ဆေး

Rohingya Eye
RB News
21.7.2017

မောင်တော ။ ။ ရခိုင်ပြည်နယ်၊ မောင်တောမြို့နယ် မြောက်ပိုင်း မောင်နှမကျေးရွာအုပ်စုမှ ဗလီဝတ်ကျောင်းတော် နှစ်လုံးကို နယ်ခြားစောင့်ရဲများက အကြောင်းမဲ့ ၀င်ရောက် စစ်ဆေးခဲ့ကြောင်း သတင်းရရှိပါသည်။ 

ဇူလိုင်လ (၁၉) ရက်နေ့ နေ့လည် ၁း၃၀ နာရီအချိန်တွင် နယ်မြေ (၆) နှင့် အောင်မင်္ဂလာကျေးရွာ အခြေစိုက် နယ်ခြားစောင့်ရဲတပ်ဖွဲ့မှ နယ်ခြားစောင့်ရဲ ၁၅ ဦးခန့်သည် မော်တော်ဆိုင်ကယ် ၇ စီးဖြင့် မောင်နှမကျေးရွာအုပ်စုသို့ ရောက်ရှိလာပြီး ဗလီဝတ်ကျောင်းတော် နှစ်လုံးကို အကြောင်းမဲ့ စစ်ဆေးခဲ့ကြောင်း ဒေသခံများက RB News သို့ပြောပါသည်။ 

“သူတို့ ရောက်လာတဲ့ အချိန်က နေ့လည် ၀တ်ပြုချိန်ထက် စောနေတော့ အပြစ်မဲ့ ဒေသခံတွေကို ဖမ်းဆီးတာမျိုး လုပ်လို့မရခဲ့ဘူး။ ရွာက လူတွေကလည်း ဘယ်အချိန် နယ်ခြားစောင့်ရဲတွေ ရောက်လာမလဲဆိုတာကို စောင့်ကြည့်ကြတယ်။ ၀င်လာပြီး အပြစ်မဲ့ရွာသားတွေကို အမြဲဖမ်းလို့ အားလုံးက ကြောက်ကြတယ်။ အခုလည်း အောင်မင်္ဂလာမှာ နေတဲ့ ကျေးရွာအုပ်ချုပ်ရေးမှူးနဲ့ ညှိနှိုင်းပြီး လုပ်ထားတဲ့ စာရင်းထဲက လူတွေကို လာရှာဖြစ်မယ်လို့ ထင်တယ်။ အပြစ်မဲ့တွေကို တရားခံတွေပါဆိုပြီး စာရင်းတွေ လုပ်ထားတာ မနည်းဘူး” ဟု ဒေသခံတစ်ဦးက ပြောပါသည်။ 

ဇူလိုင်လ (၁၁) ရက်နေ့ နံနက် ၉ နာရီအချိန်တွင် မောင်နှမ တောင်ရွာမှ ဦးဆယာဒ်ဂျိုဟာရ် (ဘ) ဦးဆော်လာမတ် (အသက် ၃၅ နှစ်) သည် ကျီးကန်းပြင် ဈေးတွင် ကွမ်းရွက်များ ရောင်းရန် သွားနေစဉ် ဇွန်လ (၃၀) ရက်နေ့တွင် ပွင့်ဖြူချောင်း ကျေးရွာတွင် အသတ်ခံရသည့် အာယာစ်အား သတ်ဖြတ်မှုတွင် ပါဝင်သည်ဟု နယ်ခြားစောင့်ရဲများက လုပ်ကြံစွပ်စွဲ၍ ဖမ်းဆီးခဲ့သည်။ ၎င်းနေသည့် ကျေးရွာနှင့် လူသတ်မှုဖြစ်သည့် ကျေးရွာတို့မှ အလွန်ဝေးကွာသော်လည်း လုပ်ကြံစွပ်စွဲ၍ ဖမ်းဆီးခဲ့ခြင်း ဖြစ်သည်။ ၎င်းသည် ကွမ်းရွက် ရောင်း၍ ရိုးရှင်းစွာ အသက်မွေးဝမ်းကျောင်း ပြုနေသူ ဖြစ်ပြီး၊ လူသတ်မှု ကျူးလွန်သူ ဖြစ်ပါက ကျီးကန်းပြင်ရှိ နယ်ခြားစောင့်ရဲတပ်ဖွဲ့ စခန်းကို ဖြတ်၍ ကွမ်းရွက်ရောင်းရန် ကျီးကန်းပြင်ဈေးသို့ သွားရန် သတ္တိလည်း ရှိမည် မဟုတ်ကြောင်း ဒေသခံများက ဝေဖန် သုံးသပ် ပြောဆိုသည်။ 

၂၀၁၆ ခုနှစ် အောက်တိုဘာလတွင် နယ်ခြားစောင့်ရဲတပ်ဖွဲ့ စခန်း (၃) ခု တိုက်ခိုက်ခံရပြီးနောက် အပြစ်မဲ့ ဒေသခံ ရိုဟင်ဂျာများကို လုပ်ကြံစွပ်စွဲမှုများ ပြုလုပ်ပြီး ဖမ်းဆီးနေသည်မှာ ယနေ့ထိ ရပ်တန့်ခြင်း မရှိသေးကြောင်း ဒေသခံများ၏ ပြောကြားချက်များ အရ သိရှိရသည်။ 




Comment ရေးရန်

Rohingya Exodus