မြန်မာ အစိုးရ လူ့အခွင့် အရေး အလေးထားဖို့ ၀န်ကြီး Kerry တိုက်တွန်းမည်
ကိုအောင်လွင်ဦး
5.8.2014
မြန်မာနိုင်ငံမှာ ဒီသီတင်း ပတ်ကုန် ကျင်းပမယ့် အာဆီယံ လုံခြုံရေး ထိပ်သီး အစည်း အဝေးပွဲကို တက်ရောက်မယ့် အမေရိကန် နိုင်ငံခြားရေး ၀န်ကြီး John Kerry ဟာ မြန်မာနိုင်ငံမှာ ပြုပြင် ပြောင်းလဲရေး လုပ်ငန်းတွေ တိုးမြှင့် လုပ်ဆောင်ဖို့ ဖိအားပေး ပြောဆိုမှာ ဖြစ်ပါတယ်။
အပြောင်း အလဲတွေ လုပ်ဆောင် နေတာ တွေကို အမေရိကန် ပြည်ထောင်စုက အားပေး သွားမှာ ဖြစ်ပေမဲ့ ပြင်ဆင်ဖို့ လိုအပ် နေတာ တွေကိုလည်း ပြောဆိုသွားမှာ ဖြစ်တဲ့ အကြောင်း နိုင်ငံခြားရေး ၀န်ကြီးဌာန အဆင့်မြင့် အရာရှိတဦးက ပြောဆိုခဲ့တာပါ။ အပြည့်အစုံကိုတော့ ကိုအောင်လွင်ဦးက တင်ပြ ထားပါတယ်။
မြန်မာနိုင်ငံက အလှည့်ကျ ဥက္ကဌ အဖြစ် တာဝန်ယူ ထားတဲ့ အရှေ့တောင်အာရှ နိုင်ငံများ အသင်း (Asean) ရဲ့ ဒေသတွင်း လုံခြုံရေး ဆိုင်ရာ ထိပ်သီး အစည်း အဝေးပွဲ ARF ကို အမေရိကန် နိုင်ငံခြားရေး ၀န်ကြီး John Kerry တက်ရောက်ရင်း မြန်မာနိုင်ငံက ပြုပြင်ဖို့ လိုအပ်နေဆဲ ကိစ္စတွေကို ဖိအားပေး ပြောဆိုမှာ ဖြစ်ပါတယ်။ မကြာသေးခင် နှစ်တွေ အတွင်း မြန်မာနိုင်ငံမှာ အပြောင်း အလဲတွေ လုပ်ဆောင် လာတဲ့ အပေါ် အမေရိကန် ပြည်ထောင်စုက အားပေးပေမဲ့ ကြီးမားတဲ့ စိန်ခေါ်မှုတွေ ရှိနေတာ ကိုလည်း ထောက်ပြမှာ ဖြစ်တယ်လို့ အမေရိကန် လက်ထောက် နိုင်ငံခြားရေး ၀န်ကြီး Daniel Russel က ပြောဆို ခဲ့တာပါ။
“အာဆီယံ ဥက္ကဋ္ဌ အဖြစ် တာဝန်ယူတာ အပါအ၀င် အခု အချိန် အထိ မြန်မာနိုင်ငံ ဆောင်ရွက် ခဲ့သမျှ တိုးတက်မှုတွေ အပေါ် ၀န်ကြီး Kerry အနေနဲ့ လေးစားတယ် ဆိုတာ ကျနော် သိပါတယ်။ ဒါပေမဲ့ လုပ်စရာတွေ တပုံကြီး ကျန်သေးတယ် ဆိုတာ ကိုလည်း သူ့အနေနဲ့ အပြည့်အ၀ သဘောပေါက် ပါတယ်။”
အထူးသဖြင့် ရှေ့နှစ် ၂၀၁၅ ခုနှစ်မှာ ရွေးကောက်ပွဲတွေ ကျင်းပဖို့ ရှိနေတာဟာ မြန်မာနိုင်ငံ အတွက် ကြီးမားတဲ့ စိန်ခေါ်မှု ဖြစ်မယ် လို့လည်း လက်ထောက် ၀န်ကြီး Russel က ပြောပါတယ်။ မြန်မာ အစိုးရ အနေနဲ့ အပြောင်း အလဲ တွေမှာ ကြုံနေရတဲ့ စိန်ခေါ်မှုတွေကို ဖြေရှင်းဖို့ ကြိုးစား နေတာ တွေ့ရပေမဲ့ မအောင်မြင် သေးတဲ့ လက္ခဏာတွေ ကိုလည်း တွေ့ရတယ်လို့ တနင်္လာနေ့က ၀ါရှင်တန် ဒီစီမှာ ပြုလုပ်ခဲ့တဲ့ သတင်းစာ ရှင်းလင်းပွဲမှာ ပြောဆို သွားတာပါ။
“ကာလ ကြာရှည် ဖြစ်ပွား နေတဲ့ ပြည်တွင်းစစ်၊ လူသားချင်း စာနာ ထောက်ထား ရမယ့် အကျပ် အတည်းတွေ၊ လူနည်းစုတွေ၊ ဘာသာရေး ကွဲပြားမှု အပေါ် လက်မခံ နိုင်တာ တွေကြောင့် ဖြစ်ပွား နေတဲ့ သွေးထွက် သံယို အကြမ်းဖက်မှုတွေ၊ ဒါတွေကို ဟန့်တားနိုင်ဖို့ အစိုးရ ကတော့ ကြိုးပမ်းနေ ပါတယ်။ ဒီလိုပဲ အခြေခံ ဥပဒေ ပြင်ဆင်ရေးနဲ့ စစ်တပ်ရဲ့ အခန်း ကဏ္ဍနဲ့ ပတ်သက်လို့ အကြီးအကျယ် မေးခွန်း ထုတ်နေတာ တွေကိုလည်း ဖြေရှင်းနိုင်ဖို့ ကြိုးစားနေ ရတာပါ။”
ဒါပေမဲ့လည်း မြန်မာနိုင်ငံရဲ့ ပြုပြင် ပြောင်းလဲရေး လုပ်ငန်းတွေမှာ ရင်ဆိုင် နေရတဲ့ အခက် အခဲ တွေကို ဖြေရှင်းရာမှာ အမေရိကန် အနေနဲ့ ၀ိုင်းဝန်း ကူညီဖို့ အသင့် ရှိနေတဲ့ အကြောင်းလည်း လက်ထောက် နိုင်ငံခြားရေး ၀န်ကြီး Russel က ပြောဆို ခဲ့တာပါ။ အမေရိကန် နိုင်ငံခြားရေး ၀န်ကြီးရဲ့ နေပြည်တော် ခရီးစဉ် မတိုင်မီမှာပဲ အမေရိကန် အောက်လွှတ်တော် အမတ် ၇၂ ယောက်ဟာလည်း လူ့အခွင့် အရေး အခြေ အနေတွေ တိုးတက်မှု မရှိသေးတဲ့ ကိစ္စတွေနဲ့ ပတ်သက်လို့ မြန်မာ အစိုးရကို ဖိအားပေးဖို့ တိုက်တွန်း စာတစောင် ပေးပို့ခဲ့ ကြပါတယ်။
ဘာသာရေး၊ လူမျိုးရေး ကွဲပြားမှုတွေ အပေါ် အခြေခံတဲ့ သွေးထွက် သံယို ပဋိပက္ခတွေ၊ မကြာသေးခင် တုန်းက သတင်း မီဒီယာသမား တွေကို အရေးယူ၊ ထောင်ချတာ တွေလို တိုးတက်မှုတွေ နောက်ပြန်ဆုတ် နေတဲ့ အခြေအနေ မျိုးတွေကိုလည်း ဥပဒေပြု အမတ်တွေက ထောက်ပြ ခဲ့ကြတာပါ။ အမေရိကန် လက်ထောက် နိုင်ငံခြားရေး ၀န်ကြီး Russel ကတော့ ၀န်ကြီး Kerry အနေနဲ့ မြန်မာ အစိုးရရဲ့ အဆင့်မြင့် တာဝန်ရှိ သူတွေနဲ့ တွေ့ဆုံရာမှာ ဒီကိစ္စတွေကို ပြောဆိုဖို့ ရည်ရွယ် ထားတယ်လို့ ဆိုပါတယ်။
“မြန်မာပြည်သူ တရပ်လုံးရဲ့ အခွင့်အရေး တွေကို လေးစား၊ အကာ အကွယ်ပေးဖို့၊ လူ့အခွင့် အရေးနဲ့ အခြေခံ လွတ်လပ်ခွင့် တွေကို ကာကွယ် စောင့်ရှောက်ဖို့ ၀န်ကြီး Kerry အနေနဲ့ မြန်မာ အစိုးရ ခေါင်းဆောင် တွေကို ဖိအား ပေးမယ်လို့ မျှော်လင့် ထားပါတယ်။”
ဝန်ကြီး Kerry ရဲ့ ခရီးစဉ် အတွင်း မြန်မာနိုင်ငံမှာ ပြုပြင် ပြောင်းလဲရေး လုပ်ငန်းတွေ နောက်ကြောင်းပြန် လှည့်မယ့် အခြေ အနေတွေ ပေါ်ပေါက် နေတာ တွေကို မြန်မာ အစိုးရ တာဝန်ရှိ သူတွေကို သတိပေး ဖို့လည်း လူ့အခွင့် အရေး လှုပ်ရှားမှု အဖွဲ့ အစည်းတွေက တိုက်တွန်း နေကြတာပါ။ အမေရိကန် ပြည်ထောင်စု နယူးယောက် အခြေစိုက် လူ့အခွင့် အရေး စောင့်ကြည့် အကဲခတ် အဖွဲ့ Human Rights Watch ကလည်း တိုးတက် ဖြစ်ထွန်းမှုတွေ ရပ်တန့်နေပြီး၊ နောက်ပြန်ဆုတ်တဲ့ လုပ်ရပ်တွေတောင် တွေ့မြင် နေရတဲ့ မြန်မာနိုင်ငံက အခြေ အနေ တွေကို အမေရိကန် ပြည်ထောင်စု အနေနဲ့ ပွင့်ပွင့် လင်းလင်း ထောက်ပြဖို့ လိုအပ်တယ် လို့လည်း ပြောဆိုခဲ့တာ ဖြစ်ပါတယ်။
