မောင်တော ခရိုင် ဒုစရိုက် နှိမ်နင်းရေး ရဲတပ်ကြပ် မောင်ချေက အပြစ်မဲ့များ ထံမှ ငွေညှစ်

မောင်တော ။ ။ ရခိုင်ပြည်နယ်၊ မောင်တော ခရိုင် ဒုစရိုက် နှိမ်နင်းရေး ရဲအဖွဲ့မှ ရဲတပ်ကြပ် မောင်ချေ (ခ) သန်းထွန်းက အပြစ်မဲ့ ဒေသခံများကို မဟုတ်မမှန် လုပ်ကြံ စွပ်စွဲမှုများ ပြုလုပ်ပြီး ငွေညှစ်ခဲ့ကြောင်း သတင်း ရရှိပါသည်။ 

မတ်လ (၂၆) ရက်နေ့ နေ့လည် ၁၂ နာရီ အချိန်တွင် မောင်တောမြို့နယ် မြို့မကညင်တန်း ကျေးရွာ အုပ်ချုပ်ရေးမှူး ရုံး၏ အောက်ရှိ ဖာရုခ် (ဘ) ဦးအလီအာမတ် (အသက် ၂၈ နှစ်) ၏ ကွမ်းယာဆိုင်ထဲရှိ GSM ဟန်းဆက် တစ်လုံးကို မောင်တော ခရိုင် ဒုစရိုက် နှိမ်နင်းရေး ရဲအဖွဲ့မှ ရဲတပ်ကြပ် မောင်ချေ (ခ) သန်းထွန်းမှ တွေ့ရှိပြီး ဘင်္ဂလား ဆင်းမ်ကဒ်ဖြင့် သုံးစွဲနေသည်ဟု စွပ်စွဲကာ ကျေးရွာ အုပ်ချုပ်ရေးမှူး ရုံးသို့ ဖမ်းဆီး ခေါ်ဆောင်သွားပြီး ငွေကျပ် (၄) သိန်း အတင်းအဓမ္မ ညှစ်ယူခဲ့ကြောင်း ဒေသခံ တစ်ဦးက RB News သို့ပြောသည်။ 

အလားတူ မြို့မကညင်တန်း ကျေးရွာမှ ဦးဖာရုခ် (ဘ) ဦးဂေါ်ဖာရ် (အသက် ၃၃ နှစ်) သည် ဈေးဝယ်၍ အိမ်ပြန်နေစဉ် အဆိုပါ ရဲတပ်ကြပ်က ဖမ်းဆီး၍ ကျေးရွာ အုပ်ချုပ်ရေးမှူး ရုံးသို့ ဖမ်းဆီး ခေါ်ဆောင်သွားပြီး ဘင်္ဂလားဖုန်း ငွေဖြည့်ကဒ် ရောင်းချသည်ဟု မဟုတ်မမှန် လုပ်ကြံ စွပ်စွဲကာ ငွေကျပ် တစ်သိန်း ညှစ်ယူခဲ့သည်။ 

အဆိုပါ ရဲတပ်ကြပ် မောင်ချေသည် ဈေးသို့ အရပ်သား ၀တ်စုံဖြင့် နေ့စဉ်နေ့တိုင်း လာရောက်ပြီး ဈေးဝယ်ရန် လာသည့် ဒေသခံ ရိုဟင်ဂျာများအား အနှောက်အယှက် ပေးသူတစ်ဦး ဖြစ်သည်ဟု ဆိုသည်။

ဒေသခံ ရွာသား တစ်ဦးက “ကျွန်တော် ငယ်ငယ်ကတည်းက အဲဒီ ရဲတပ်ကြပ် မောင်ချေကို ဒီမှာဘဲ မြင်ဖူးနေတာပါ။ သူ့ကို အခြားမြို့တွေကို တာဝန်ပြောင်းပေးတာမျိုး မရှိဘူး။ ယူနီဖောင်း ၀တ်တာလည်း တစ်ခါမှ မမြင်ရဘူး။ နေ့တိုင်း ကညင်တန်းဈေးနဲ့ မြို့ပေါ် မီးစက်ခွဆုံမှာ ထိုင်တယ်။ ပြီးတော့ ငွေညှစ်လို့ ရနိုင်မယ့်သူတွေကို ခေါ်ပြီး သူထိုင်တဲ့ ဆိုင်ထဲကို ခေါ်သွားပြီးတော့ မဟုတ်မမှန် လုပ်ကြံ စွပ်စွဲပြီး ငွေညှစ်တယ်။ သူကတော့ တရားဝင် လိုင်စင်ရ ဓါးပြလို ဖြစ်နေတယ်” ဟုပြောသည်။