နယ်ခြားစောင့် ရဲများနှင့် စစ်သားများက လမ်းသွားလမ်းလာ များထံမှ ငွေညှစ်၊ လုယက်လျက်ရှိ

11.7.2015

မောင်တော ။ ။ ရခိုင်ပြည်နယ်၊ မောင်တော မြို့နယ် မြောက်ပိုင်း အမှတ် (၆) နယ်မြေ၊ ကျောက်လှေကား စခန်းမှ နယ်ခြားစောင့် ရဲတပ်ဖွဲ့ဝင် ငါးဦးသည် ဇင်ပိုင်ညာ ခွဆုံသို့ သွားရောက်၍ တစ်နေကုန် စောင့်ဆိုင်းကာ လမ်းမှ ဖြတ်သန်း သွားလာသူများကို စစ်ဆေးလျက် ရှိသည်။ ၎င်းတို့သည် အမျိုးသမီးများကိုပါ စစ်ဆေးလျက် ရှိပြီး၊ စစ်ဆေးရာတွင်လည်း ခန္ဓာကိုယ် အနှံ့ကို ကိုင်တွယ်ကာ စစ်ဆေးလေ့ ရှိသည်ဟု ဒေသခံများက RB News သို့ပြောသည်။ 

နယ်ခြားစောင့် ရဲများသည် ဆိုင်ကယ်နှင့် ကားများကို ရပ်တန့်ခိုင်းကာ ယာဉ်မောင်းလိုင်စင်၊ ယာဉ်မှတ်ပုံတင်၊ ဘီးခွန်သွင်း ပြေစာ၊ ဆိုင်ကယ် ဦးထုပ် တို့ကို စစ်ဆေး၍ ငွေညှစ်လေ့ ရှိသည်ဟု ဆိုသည်။ ငွေညှစ်သည့် အခါ ငွေမပေးနိုင်သူများကို ရိုက်နှက်၍ ပါလာသည့် ပစ္စည်းများကို လုယက်လေ့ ရှိသည်ဟု ဒေသခံများက ပြောပါသည်။ 

အမှတ် (၅) နယ်မြေ စခန်း၊ ငါးခူရမှ နယ်ခြားစောင့် ရဲများသည်လည်း အချိန်မတော် ရိုဟင်ဂျာရွာများ အတွင်းသို့ ၀င်ရောက်၍ လှည့်လည်ကာ လမ်းသွားလမ်းလာ အမျိုးသား အမျိုးသမီး မရွေး ကိုယ်ထိလက်ရောက် စော်ကား၍ ငွေများ၊ ပစ္စည်းများ လုယက်လျက် ရှိသည်ဟု ဒေသခံများ၏ ပြောကြားချက်များ အရ သိရှိရသည်။ ဒေသခံ ရွာသားများ ထံတွင် MPT GSM ဖုန်းနှင့် CDMA ဖုန်းများ တွေ့လျှင်လည်း ၎င်းဖုန်းများထဲတွင် ဘင်္ဂလား ဆင်းမ်ကဒ်များ တွေ့ရှိသည်ဟု လုပ်ကြံ၍ ငွေညှစ်လေ့ ရှိသည်ဟု ဆိုသည်။ 

ရွက်ညိုတောင် စခန်း (၁၀) မှ စစ်သားများသည် ရွက်ညိုတောင် တံတားပေါ်မှ ဖြတ်သန်း သွားလာသော ငါးရောင်းသူများ၊ ဟင်းသီးဟင်းရွက် ရောင်းသူများထံမှ စိတ်တိုင်းကျ လုယက်ပြီး၊ ဈေးသည်များက ဟန့်တားလျှင် လူမဆန်စွာ ရိုက်နှက်ကြောင်း၊ ချောင်းမှ ငါးဖမ်း၍ အသက်မွေးဝမ်းကျောင်း ပြုနေသော ငါးဖမ်းသမား များထံမှလည်း အဆိုပါ စစ်သားများ လုယက်လျက် ရှိသည်ဟု ဒေသခံများက ပြောပါသည်။ ငါးမပေးသည့် ငါးဖမ်းသမားများကို ရိုက်နှက်၍ ပိုက်ကွန်များကိုပါ သိမ်းဆည်းမည်ဟု ခြိမ်းခြောက်သည်ဟု ဆိုသည်။