ငါတို့အပေါ် ဖြတ်သန်းသွားခဲ့ပြီ

(ဓါတ်ပုံ - စိုးဇေယျာထွန်း / ရိုက်တာ)

ငါတို့အပေါ် ဖြတ်သန်းသွားခဲ့ပြီ

မောင်ဇာနည် (MYARF)
RB ကဗျာ
30.10.2016

နာမည်တောင် မမှည့်ရသေးတဲ့ နို့စို့ကလေးကို
မိခင်ရင်အုံထဲက ဆတ်ခနဲ လုယူပြီး
တဝုန်းဝုန်း လောင်မြိုက်နေတဲ့ မီးလျှံထဲ ပစ်ချတော့
အငြိုးကြီးစွာ လောင်ကျွမ်းခြင်းခံလိုက်ရတယ်။
ထိုကဲ့သို့သော အချိန်အခါလည်း
ငါတို့အပေါ် ဖြတ်သန်းသွားခဲ့ပြီ။

ရက်ပေါင်းများစွာ အစာရေစာပြတ်လပ်လို့
ဘေးမကင်းတာကို သိရက်သားနဲ့
ဘဝဆိုးက လွတ်မြောက်ဖို့အရေး
မခိုင်ခန့်တဲ့ စက်လှေပေါ်တက်လိုက်ရပေမယ့်
နောက်ဆုံး မှီခိုရာကမ်းကို မရောက်နိုင်ဘဲ
တစ်မိသားစုလုံး ပင်လယ်ထဲနစ်မြုပ်ခံလိုက်ရတယ်။
ထိုကဲ့သို့သော အချိန်အခါလည်း
ငါတို့အပေါ် ဖြတ်သန်းသွားခဲ့ပြီ။

ကိုယ်ဝန်ဆောင် သုံးလတာ ကာလ
အပြစ်ကင်းစင်တဲ့ အမျိုးသမီးလေးဟာ
စစ်သားတွေရဲ့အုပ်စုဖွဲ့ တပြုံးပြုံး တဏှာဖြေခဲ့မှုအောက်
သွေးတသွင်သွင်ဖြင့် ကိုယ်ဝန်ဖျက်ခံလိုက်ရတယ်။
ထိုကဲ့သို့သော အချိန်အခါလည်း
ငါတို့အပေါ် ဖြတ်သန်းသွားခဲ့ပြီ။

ဘဝရဲ့ အချိုအခါးတောင် မသိသေးတဲ့
ချစ်စရာ ခုနှစ်တန်းကျောင်းသားကလေး
စစ်သားတွေရဲ့ အနီးကပ် ပစ်ခတ်ခံရပြီး
အကြောင်းမဲ့ အသက်ရှုံးဆုံးခံလိုက်ရတယ်။
ထိုကဲ့သို့သော အချိန်အခါလည်း
ငါတို့အပေါ် ဖြတ်သန်းသွားခဲ့ပြီ။

မိမိ ခိုစရာအိမ်လေး မီးရှို့ခံရလို့
အိုးမဲ့အိမ်မဲ့နေတဲ့ အပျိုစင်မိန်းကလေး
နီးစပ်ရာ ဆွေမျိုး နေအိမ်ကို ပြေးခိုလှုံချိန်
စီးနင်းဝင်လာတဲ့ စစ်သားတွေရဲ့
အကြိမ်ကြိမ်အုပ်စုဖွဲ့ မုဒိမ်းကျင့်ခံရကာ
ဆေးကုသမှု ခံယူခွင့်မသာခဲ့တဲ့နောက်
လောကကြီးကို ကျောခိုင်းသွားခဲ့ရတယ်။
ထိုကဲ့သို့သော အချိန်အခါလည်း
ငါတို့အပေါ် ဖြတ်သန်းသွားခဲ့ပြီ။

ရွာလုံးကျွတ် မီးရှို့ခံရစဉ်
အိုမင်းမစွမ်း ဖြစ်နေတဲ့ အဘိုးအဘွားတွေ
ရုန်းထွက်လာနိုင်ခြင်း မတတ်နိုင်ရှာတဲ့အခါ
မီးတောင်အလား လောင်မြိုက်နေတဲ့ မီးထဲ
ပြာကျသွားခဲ့ ရတယ်။
ထိုကဲ့သို့သော အချိန်အခါလည်း
ငါတို့အပေါ် ဖြတ်သန်းသွားခဲ့ပြီ။

ဪ... ငါတို့အပေါ်
ဒီလောက်တောင် ဖြတ်သန်းသွားခဲ့ပြီလား။
ညှဉ်းပန်းနှိပ်စက်ခံရမှုမှာ နှိုင်းစရာဆိုလို့
ဟောဒီက ငါတို့နဲ့ငါတို့သာ ရှိမယ်ထင်တယ်။
ဒါပေမယ့်...
ဖြစ်ခဲ့ပြီးသမျှ အရာရာကို
လောကဓံရဲ့စမ်းသပ်မှုလို့ မှတ်ယူရင်း
ခံစားချက်ခါးခါးလေးတွေကို
သည်းခံမှုနဲ့ အပေးအယူလုပ်ရင်း
ဘဝကို အသက်ဆက်နေရတဲ့ ငါတို့ကို
အကြမ်းဖက်သမား သမုတ်နေတာကတော့
ခင်ဗျားတို့ သိပ်လွန်လွန်းပါတယ်ဗျ။