ကြက်ရိုးပြင်နှင့် ပြောင်းပိုက် ရွာများကို နေရာပြောင်းရွှေ့ရန် ရွာသူရွာသားများကို အာဏာပိုင်များက ဖိအားပေး

RB News

30.4.2017

မောင်တော ။ ။ ရခိုင်ပြည်နယ်၊ မောင်တောမြို့နယ် မြောက်ပိုင်း၌ စစ်တပ်က မီးရှို့ဖျက်ဆီးခဲ့သည့် ကြက်ရိုးပြင်ကျေးရွာနှင့် ငါးစားကြူးကျေးရွာအုပ်စု၊ ပြောင်းပိုက် ကျေးရွာတို့ကို မူလနေရာမှ အခြားနေရာသို့ ရွှေ့ပြောင်းရန် အာဏာပိုင်များက ရွာသူရွာသားများကို ဖိအားပေးလျက် ရှိကြောင်း သတင်းရရှိပါသည်။

ဧပြီလ (၂၉) ရက်နေ့တွင် မောင်တောမြို့နယ် မြောက်ပိုင်း ကြက်ရိုးပြင်ကျေးရွာနှင့် ငါးစားကြူး ကျေးရွာအုပ်စု ပြောင်းပိုက်ကျေးရွာများသို့ မြို့နယ် အုပ်ချုပ်ရေးအဖွဲ့နှင့် မြေစာရင်းဦးစီးဌာနတို့မှ တာဝန်ရှိသူများ ရောက်ရှိလာပြီး နေအိမ်မီးရှို့ခံခဲ့ရသည့် ရွာသူရွာသားများကို ဆင့်ခေါ်၍ အစည်းအဝေး ပြုလုပ်ခဲ့သည်။ အစည်းအဝေးတွင် ရွာသူရွာသားများကို မိမိတို့ ကြိုက်သည့်နေရာတွင် ကြိုက်သလို အိမ်များ ဆောက်လို့ရမည် မဟုတ်ကြောင်း၊ အစိုးရက ချမှတ်ပေးသည့် နေရာသို့ ရွှေ့ပြောင်း နေထိုင်ရမည်ဟု ဖိအားပေး ပြောဆိုသွားကြောင်း ရွာသားများက RB News သို့ပြောပါသည်။

အစိုးရက ချမှတ်ပေးသည့် နေရာသည် ရွာ၏ ပြင်ပတွင် ရေ၀ပ်သော၊ ချောင်ကျသည့် နေရာဖြစ်ကြောင်း၊ မိမိတို့သည် အခြားနေရာမှ ပြောင်းဝင်လာသူများ မဟုတ်ကြောင်း၊ မိမိတို့တွင် မိမိတို့ပိုင်ဆိုင်သည့် မြေနေရာ ရှိနေသဖြင့် အခြားသူများ၏ လယ်မြေများတွင် သွားရောက်၍ နေထိုင်လိုခြင်း မရှိကြောင်း၊ မိမိတို့၏ နေအိမ်များကို စစ်တပ်က နယ်မြေရှင်းလင်းစဉ် မီးရှို့ခဲ့ခြင်း ဖြစ်၍ မိမိတို့တွင် အပြစ်မရှိကြောင်း၊ ဥပဒေအရ မူလနေရာတွင်သာ အစိုးရစရိတ်ဖြင့် ပြန်လည် ဆောက်လုပ်ပေးမည်ဟု အပြည့်အ၀ ယုံကြည်ကြောင်း တို့ကို ရွာသားများက အစည်းအဝေးတွင် တင်ပြခဲ့ကြောင်း သိရှိရပါသည်။