ငါးစားကြူးနှင့် ကြက်ရိုးပြင်မှ အပြစ်မဲ့ ဒေသခံရိုဟင်ဂျာ ၂၀ ဦးခန့် ဖမ်းဆီးထား

RB News

26.10.2016

မောင်တော ။ ။ ရခိုင်ပြည်နယ်၊ မောင်တောမြို့နယ် မြောက်ပိုင်း ငါးစားကြူး ကျေးရွာအုပ်စုနှင့် ကြက်ရိုးပြင် ကျေးရွာအုပ်စု တို့မှ အပြစ်မဲ့ ဒေသခံရိုဟင်ဂျာ ၂၀ ဦးခန့် ဖမ်းဆီးထားကြောင်း သတင်း ရရှိပါသည်။ 

ယနေ့ အောက်တိုဘာလ (၂၆) ရက်နေ့ နံနက် ၆း၃၀ နာရီအချိန်တွင် ငါးစားကြူး ကျေးရွာအုပ်စု၊ တောင်ရွာမှ အပြစ်မဲ့ ဒေသခံရိုဟင်ဂျာ (၁၁) ဦးကို ဖမ်းဆီးခဲ့သည်။ သက်ကြီးရွယ်အို တစ်ဦးကို လူမဆန်စွာ ရိုက်နှက်ပြီး ပြန်လည် လွှတ်ပေးခဲ့သော်လည်း ကျန်သည့် (၁၀) ဦးကို ယခုအချိန်ထိ ဖမ်းဆီးထားကြောင်း ဒေသခံများက RB News သို့ပြောသည်။ 

ဖမ်းဆီးခံထားရသည့် အပြစ်မဲ့ (၁၀) ဦးမှာ --

(၁) ဦးနူရ်ဟူစိန်း (ဘ) ဦးအဒူရှကူရ် (အသက် ၇၀ နှစ်)

(၂) ဦးအာလ်တာဟူစိန်း (ဘ) ဦးအော်လီဟူစိန်း (အသက် ၂၇ နှစ်)

(၃) ဦးအာခ်ဘောရ်ကာမာလ် (ဘ) ဦးအော်လီဟူစိန်း (အသက် ၂၅ နှစ်) 

(၄) ဦးရှော်ဘိရ် (ဘ) ဦးဘော်ဒူဇာမာ (အသက် ၆၀ နှစ်)

(၅) ဦးအာဘူလ်ကာဆိမ်း (ဘ) ဦးမာရာဇာ (အသက် ၆၇ နှစ်)

(၆) ဦးရှုနာအလီ (ဘ) ဦးမောဂူလ်အလီ (အသက် ၆၅ နှစ်)

(၇) ဦးဇာဖောရ် (ဘ) ဦးရှုနာအလီ (အသက် ၆၃ နှစ်)

(၈) ဦးဟာမိတ်ဟူစိန်း (ဘ) ဦးဟားဆူမျာ (အသက် ၆၀ နှစ်)

(၉) ဦးအော်လီဟူစိန်း (ဘ) ဦးဟားဆူမျာ (အသက် ၆၂ နှစ်)

(၁၀) မော်လ၀ီဦးအော်လီဟူစိန်း (ဘ) ဦးအဒူရှကူရ် (အသက် ၆၅ နှစ်) -- တို့ဖြစ်သည်။ 

စစ်သားများသည် ညပိုင်းတွင် ရွာထဲ၌ တဲထိုး၍ စောင့်နေသည့် အတွက် ရွာသားများက အကြောင်းမဲ့ ဖမ်းဆီးမည်ကို စိုးရိမ်၍ ထွက်ပြေး တိမ်းရှောင်နေကြကြောင်း သိရှိသည်။ နေ့ပိုင်းတွင် စစ်သားများက ဆိုင်ခန်းများကို ဖျက်ဆီး၍ ပစ္စည်းများ လုယက်ခဲ့ကြောင်း ဒေသခံများက ပြောပါသည်။

အောက်တိုဘာလ (၂၃) ရက်နေ့တွင် စစ်သားများသည် ကြက်ရိုးပြင် ကျေးရွာသို့ ၀င်ရောက်၍ ကျေးရွာ အုပ်ချုပ်ရေးမှူး ဦးမောင်မောင်ကြီး၊ ရာအိမ်မှူး ဦးဇူရီးယာ၊ ဦးအနိုဝါရ်နှင့် အခြားရွာလူကြီး တစ်ဦး တို့ကို မေးမြန်းရန်ဟုဆိုကာ ခေါ်ဆောင်သွားခဲ့သည်။

အောက်တိုဘာလ (၂၄) ရက်နေ့ နေ၀င်ချိန်တွင် စစ်သား (၅) ဦးက ဦးအနိုဝါရ်နှင့် ရာအိမ်မှူး ဦးဇူရီးယာ တို့နှင့် အတူ ကြက်ရိုးပြင်ရွာသို့ ပြန်လည်ရောက်ရှိလာပြီး ကျေးရွာတာဝန်ခံရန် လူကြီးများ လိုအပ်နေကြောင်း၊ ကျေးရွာလူကြီးများနှင့် အုပ်ချုပ်ရေးမှူး တို့က တာဝန်ယူလျှင် လုံခြုံရေးတပ်ဖွဲ့ဝင်များက ၀င်ရောက် စီးနင်းမည် မဟုတ်ကြောင်း ပြောဆိုကာ ဦးဟာရှိမ်း၊ ဦးအီနုစ်၊ ဦးဇော်ဘူ၊ ဦးဒိလ်ဒါရ်ကာမာလ် တို့ကိုလည်း ခေါ်ဆောင် သွားခဲ့သည်။

“သူတို့ကို ဘယ်နေရာ ခေါ်သွားလဲ ဆိုတာ အသေအချာ မသိရသေးဘူး။ ကျွန်တော်တို့ကတော့ BGP ဌာနချုပ်ကို ခေါ်သွားတယ်လို့ ထင်တယ်။ လူကြီး (၇) ယောက်နဲ့ အုပ်ချုပ်ရေးမှူး တို့ဆီက ခံဝန်ချက် ယူပြီး ၂၅ ရက်နေ့ ပြန်လွှတ်ပေးမယ်လို့ ကြားပေမယ့်လည်း အခုထိ ပြန်ရောက်မလာသေးဘူး” ဟု ဒေသခံတစ်ဦးက ပြောသည်။