မောင်တောမြို့မှ ခွင့်ပြုချက်မဲ့ အဆောက်အဦများ အစီရင်ခံရန် အာဏာပိုင်များက ပြော
Rohingya Eye
RB News
19.9.2016
မောင်တော ။ ။ ရခိုင်ပြည်နယ်၊ မောင်တော မြို့နယ်၊ မြို့နယ် အထွေထွေ အုပ်ချုပ်ရေး ဦးစီးဌာန ခန်းမဆောင်တွင် မြို့နယ် အုပ်ချုပ်ရေးမှူး ဦးလှမြင့်၊ ရခိုင်ပြည်နယ် နယ်စပ်ရေးရာ ၀န်ကြီး ဗိုလ်မှူးကြီးထိန်လင်း၊ ပြည်နယ် ဥပဒေချုပ် တို့က စက်တင်ဘာလ (၁၈) ရက်နေ့ နံနက် ၈ နာရီ အချိန်တွင် ရပ်ကွက်၊ ကျေးရွာ အုပ်ချုပ်ရေးမှူး များနှင့် အစည်းအဝေး ပြုလုပ်ရာတွင် ရခိုင်ပြည်နယ် နယ်စပ်ရေးရာ ၀န်ကြီး ဗိုလ်မှူးကြီးထိန်လင်းက “ဘင်္ဂလားဒေ့ရှ် နိုင်ငံက တရားမ၀င် ၀င်ရောက်ပြီး နေအိမ်များကို တရားမ၀င် ဆောက်လုပ် နေထိုင်လျက် ရှိတယ်၊ ခွင့်ပြုချက် အမိန့်မရှိတဲ့ အိမ်များကို ဖျက်ရမယ်၊ လယ်မြေများတွင် ဆောက်ခဲ့တဲ့ အိမ်များကိုလည်း ဖျက်ပေးရမယ်၊ အိမ်ထောင်စုစာရင်း တစ်ခုမှာ အိမ်တစ်အိမ်ဘဲ ရှိရမယ်၊ ကျေးရွာတွေမှာ ခွင့်ပြုချက် အမိန့်မပါဘဲ ဆောက်ခဲ့တဲ့ အိမ်များစာရင်း အတိအကျကို အစီရင်ခံရမယ်” ဟု ပြောဆိုခဲ့ရာ၊ မြို့ပေါ် ရပ်ကွက် အုပ်ချုပ်ရေးမှူး တစ်ဦးက “မိမိတို့ ဒေသဟာ မဖွံ့ဖြိုးသေးသောကြောင့် အိမ်အများစုသည် ၀ါး၊ ဓနိ၊ သစ်သားဖြင့် ဆောက်လုပ်ထားသည့် အိမ်များ ဖြစ်ကြပြီး၊ ယခင် န.စ.က လက်ထက်တွင် သက်ဆိုင်ရာ ဌာနဆိုင်ရာရဲ့ ခွင့်ပြုချက် အမိန့်ဖြင့် ဆောက်လုပ်ခဲ့ကြပြီး၊ န.စ.က ရုတ်သိမ်းပြီးနောက် အခိုင်အမာ ဆောက်လုပ်သော တိုက်အိမ်များမှအပ ကျန်အိမ်များ ဆောက်လုပ်ရာတွင် ခွင့်ပြုချက် မလိုအပ်ဘဲ ဆောက်လုပ်နိုင်သောကြောင့် မိမိတို့ ကျေးရွာများတွင် အိမ်အများစုသည် တိုက်အိမ်များ မဟုတ်သောကြောင့် မိမိတို့ အနေဖြင့် ဖျက်ရန် အခက်အခဲရှိမည် ဖြစ်ကြောင်း” ဟု တင်ပြခဲ့ရာ နောက်ဆုံးတွင် နယ်စပ်ရေးရာဝန်ကြီး ဗိုလ်မှူးကြီးထိန်လင်းက ၂၀၁၅ - ၂၀၁၆ ခုနှစ်တွင် ခွင့်ပြုချက် အမိန့်မပါဘဲ ဆောက်လုပ်ခဲ့သော အိမ်များ၊ သာသနာ့ အဆောက်အဦများကို ဖျက်ရမည် ဖြစ်ပြီး၊ ကျေးရွာအုပ်စု အသီးသီးတွင်လည်း ခွင့်ပြုချက် အမိန့်မပါဘဲ ဆောက်လုပ်ခဲ့သည့်အိမ်များ၊ သာသာနာ့ အဆောက်အဦများ စာရင်း အတိအကျ အစီရင်ခံရမည်ဟု အုပ်ချုပ်ရေးမှူးများအား ညွန်ကြားခဲ့ကြောင်း ဒေသခံများက RB News သို့ပြောသည်။
“မိမိတို့ မောင်တောမြို့မှာ ရှိတဲ့ ကျေးရွာများက အိမ်အများစုသည် အခိုင်အမာ ဆောက်လုပ်ထားသည့် အဆောက်အဦများ မဟုတ်ကြောင်း၊ မြို့ပြအိမ်ရာ စီမံခန့်ခွဲရေး ဥပဒေအရ အခိုင်အမာ အဆောက်အဦ ဖြစ်သည့် တိုက်အိမ်များ အတွက်သာ ခွင့်ပြုချက် လိုအပ်ပြီး၊ ကျန်အဆောက်အဦများ အတွက် ခွင့်ပြုချက် အမိန့် မလိုအပ်ကြောင်း၊ ကျေးရွာ ဖွံ့ဖြိုးရေးအတွက် အစိုးရအနေဖြင့် မြို့ပြအိမ်ရာ စီမံခန့်ခွဲရေး ဥပဒေအရ အိမ်ဆောက်လုပ်ခွင့် ပေးရမည် ဖြစ်သလို၊ယခုအခါ ခွင့်ပြုချက် အမိန့်မပါဘဲ ဆောက်ခဲ့သော အိမ်များ၊ သာသာနာ့ အဆောက်အဦများကို ဖျက်ရန် ညွန်ကြားမှုကြောင့် ဒေသတွင်း မတည်မငြိမ်မှုများ ဖြစ်ပေါ်လာမည်ကို စိုးရိမ်နေရကြောင်း” ရပ်ကွက်လူကြီး တစ်ဦးက ပြောပါသည်။
