ရိုဟင်ဂျာ အမတ်များလည်း ပါဝင်ခွင့်မရ၊ မဲပေးခွင့်လည်း မပေးတော့မယ့် ပြည်ခိုင်ဖြိုး
ကျော်စွာဝင်း
RB News
20.7.2015
ပြည်ခိုင်ဖြိုး (ပြည်ထောင်စု ကြံ့ခိုင်ရေးနှင့် ဖွံ့ဖြိုးရေး ပါတီ - USDP) ဆိုတာ ယခင် စစ်အစိုးရရဲ့ ပါတီ ဖြစ်တယ်ဆိုတာ လူတိုင်းသိကြပါတယ်။ ၂၀၀၈ ခုနှစ်တုန်းက ဖွဲ့စည်းပုံ အခြေခံ ဥပဒေ အတွက် ဆန္ဒခံယူပွဲ ပြုလုပ်ခဲ့တုန်းက စစ်အစိုးရက ရိုဟင်ဂျာများ ဆုံးရှုံးသွားတဲ့ နိုင်ငံသား အခွင့်အရေး၊ လူ့အခွင့်အရေးများ ပြန်လည် ရရှိမယ်လို့ ကတိပေးပြီး ထောက်ခံခိုင်း ခဲ့လို့ ထောက်ခံပေးခဲ့ပါတယ်။ ဘာတစ်ခုမှ ဖြစ်မလာခဲ့ဘူး။
၂၀၁၀ ခုနှစ်က ယနေ့ သမ္မတ တာဝန်ယူထားတဲ့ ဦးသိန်းစိန် ကိုယ်တိုင် ဗိုလ်ချုပ်ကြီး သိန်းစိန် ဘ၀နဲ့ ဘူးသီးတောင်နဲ့ မောင်တောမြို့နယ် တွေကို လာရောက်ပြီး ပြည်ခိုင်ဖြိုးပါတီကို မဲပေးဖို့၊ အခွင့်အရေးများ အားလုံး ပြန်လည် ရရှိမယ်လို့ ကတိပေးခဲ့သလို၊ ပြည်ခိုင်ဖြိုး ပါတီ ကိုယ်စားပြု ယှဉ်ပြိုင်မယ့် အမတ်များကလည်း တူညီတဲ့ ကတိက၀တ် ပြုပြီး ရိုဟင်ဂျာ ပြည်သူများဆီက မဲယူခဲ့တယ်။ အခြေအနေ ထူးခြားမလာတဲ့ အပြင် အဆိုးဆုံး အခြေအနေကို ယနေ့ ရင်ဆိုင်နေရပါတယ်။
ပြည်ထောင်စု ရွေးကောက်ပွဲ ကော်မရှင်က ၂၀၁၅ ခုနှစ် ရွေးကောက်ပွဲကို နိုဝင်ဘာလ (၈) ရက်နေ့မှာ ကျင်းပမယ်လို့ ကြေညာပြီးတဲ့ နောက်ပိုင်းမှာ ရခိုင်ပြည်နယ် မြောက်ပိုင်းက ပြည်ခိုင်ဖြိုး အမတ်များက ရွေးချယ်ခံဖို့ အမတ်များ စာရင်းကို တင်သွင်းခဲ့တယ်။ ဘူးသီးတောင်နဲ့ မောင်တော ဒေသမှာ ပြည်ခိုင်ဖြိုး အမတ် (၅) ဦး ရှိပြီး၊ နှစ်စု ကွဲနေတယ်လို့ ပြောရင် မှားမယ် မထင်ဘူး။ အဲဒီတော့ နှစ်စုလုံးက မိမိတို့နဲ့ အဆင်ပြေမယ့်သူတွေရဲ့ အမည်များကို တင်သွင်းခဲ့တယ်။
ရခိုင်ပြည်နယ်မှာ ရိုဟင်ဂျာများ ယှဉ်ပြိုင်ရင် အနိုင်ရမယ့် မဲဆန္ဒနယ် (၁၃) နေရာ ရှိနေပါတယ်။ ၂၀၁၂ ခုနှစ်တုန်းက မဲကို ညှိနှိုင်းခဲ့လို့ ရိုဟင်ဂျာ အမတ်နေရာ နည်းခဲ့ခြင်း ဖြစ်ပါတယ်။
ဗြိတိသျှ လက်အောက်ခံ လက်ထက် ၉၁ ဌာန အုပ်ချုပ်ရေးခေတ်ကလည်း ရိုဟင်ဂျာများဟာ မြန်မာ တိုင်းရင်းသားများ အဖြစ် မဲပေးခွင့် ရခဲ့ပြီး၊ မြန်မာ့ လွတ်လပ်ရေး ဗိသုကာ ဗိုလ်ချုပ်အောင်ဆန်းရဲ့ တိုင်းပြုပြည်ပြု လွှတ်တော်မှာလည်း ရိုဟင်ဂျာ အမတ် နှစ်ဦး ပါဝင်ခဲ့သလို၊ လွတ်လပ်ရေး ရပြီး ဦးနုခေတ်၊ မ.ဆ.လ ပါတီ ဦးနေ၀င်းခေတ်မှာလည်း ရွေးချယ်ခံခွင့်၊ မဲပေးပိုင်ခွင့်များ ရရှိခဲ့ပါတယ်။
စစ်အစိုးရလက်ထက် ၁၉၉၀ ခုနှစ် ရွေးကောက်ပွဲမှာလည်း မဲပေးခွင့် ရခဲ့သလို၊ ရွေးချယ်ခံခွင့် ရှိခဲ့လို့သာ အမျိုးသား ဒီမိုကရက်တစ် လူ့အခွင့်အရေး ပါတီ (NDPH) က လွှတ်တော်အမတ် လေးဦး ရွေးချယ်ခံခဲ့ရတာပါ။ ၂၀၁၀ ခုနှစ် ရွေးကောက်ပွဲမှာလည်း မဲပေးခွင့် ရခဲ့လို့ ယနေ့ ပြည်ခိုင်ဖြိုးက လွှတ်တော် အမတ် (၅) ဦး ရှိနေခြင်း ဖြစ်ပါတယ်။
ခေတ်အဆက်ဆက်မှာ တိုင်းရင်းသားများ၊ နိုင်ငံသားများနဲ့ တန်းတူ အမျိုးသား မှတ်ပုံတင် ကဒ်ပြားများ ကိုင်ဆောင်ခွင့် ရခဲ့ပြီး၊ စစ်အစိုးရ လက်ထက်မှာ စနစ်တကျ စီမံကိန်း ရေးဆွဲပြီး၊ ယာယီ သက်သေခံ ကဒ်ပြားများကို အတင်းအဓမ္မ ကိုင်ဆောင်ခိုင်းခဲ့တယ်။ ယခုအခါမှာတော့ အစိမ်းနုရောင် ယာယီ နေထိုင်ခွင့် ကဒ်ပြားများ သဖွယ် အတင်းအဓမ္မ ကိုင်ခိုင်း နေတာကို ရိုဟင်ဂျာ မိဘ ပြည်သူများ အားလုံး အသိပင် ဖြစ်ပါတယ်။
ရိုဟင်ဂျာများ အနေနဲ့ ခေတ်အဆက်ဆက်မှာ တိုင်းရင်းသား အဖြစ် ရပ်တည်နိုင်ခဲ့ပြီးမှ ယခု အစိုးရ လက်ထက်မှာ ခိုးဝင် ဘင်္ဂါလီများ အဖြစ် သတ်မှတ်ခံရခြင်း ဘ၀ကို ရောက်ရှိခဲ့ရတော့ပါတယ်။
ဝှိုက်ကဒ် ယာယီ သက်သေခံ ကဒ်ပြားများကို သိမ်းဆည်းပြီး အစိမ်းနုရောင် ကဒ်ပြားများ ထုတ်ပေးပြီး နိုင်ငံသား လျှောက်ထားခိုင်းခြင်းရဲ့ ရည်ရွယ်ချက်မှာ ရာစုနှစ်ပေါင်းများစွာ မိမိတို့ရဲ့ ပင်ရင်း နိုင်ငံအဖြစ် နေထိုင်လာတဲ့ အာရ်ကာန် ဒေသရဲ့ မူလဘူတ တိုင်းရင်းသား ရိုဟင်ဂျာ များကို နိုင်ငံခြားမှ ရောက်ရှိလာသူများ အဖြစ် သတ်မှတ်ပြီး ပြုနိုင်ငံသား ကဒ်ပြား (အစိမ်းရောင်) များ ကိုင်ဆောင်ခိုင်းဖို့ လုပ်ဆောင် နေတာကြောင့် ရိုဟင်ဂျာ ပြည်သူတွေက အခုထုတ်ပေးနေတဲ့ နှစ်နှစ် သက်တမ်း ရှိတဲ့ အစိမ်းနုရောင် ကဒ်ပြားကို ခါးခါးသီးသီး ငြင်းဆန် နေကြခြင်း ဖြစ်ပါတယ်။
နိုင်ငံသား၊ ပြုနိုင်ငံသားနဲ့ ဧည့်နိုင်ငံသားများသာ မဲပေးခွင့် ရှိမယ့် လာမယ့် ရွေးကောက်ပွဲမှာ ရိုဟင်ဂျာတွေဆီက မဲရဖို့ ရိုဟင်ဂျာများကို ၂ လ - ၃ လ အတွင်း ပြုနိုင်ငံသား ထုတ်ပေးနိုင်မှသာ မဲရမှာ ဖြစ်တယ်ဆိုတာ ပြည်ခိုင်ဖြိုး ပါတီလည်း သိပါတယ်။ အဲဒီတော့ အစိမ်းနုရောင် ကဒ်ပြားကို ငြင်းနေတဲ့ ရိုဟင်ဂျာ ပြည်သူများဆီက မဲရမယ်ဆိုတာကို မျှော်လင့်လို့ မရတော့တဲ့ အတွက် ရိုဟင်ဂျာ အမတ်များကို မရွေးချယ်ဖို့ ပြည်ခိုင်ဖြိုး ဗဟိုက ဆုံးဖြတ်လိုက်တာကို မြေပြင်မှာ ရှိတဲ့ ပါတီ အကြီးအကဲ အချို့ဆီက သိလာရတယ်။
ယခု နောက်ဆုံးရ သတင်းများအရ ရခိုင်ပြည်နယ် မြောက်ပိုင်းက ပြည်ခိုင်ဖြိုး ပါတီဝင် မွတ်စလင် အမတ် ရွေးထားတယ်လို့ နိုင်ငံတကာကို ပြရုံသက်သက် အနေနဲ့ အမတ်တစ်ယောက်ကိုသာ ရွေးချယ်ခံခွင့် ပေးမှာ ဖြစ်ပြီး၊ ကျန်တဲ့ မဲဆန္ဒနယ် (၁၂) နေရာမှာ ဘယ်မွတ်စလင် ရိုဟင်ဂျာကိုမှ ရွေးချယ်ခံခွင့် ပေးမှာ မဟုတ်ဘူးလို့ သိရတယ်။ ရွေးချယ်ခံခွင့် ပေးမယ် ဆိုတဲ့ တစ်ယောက်ကလည်း အမျိုးသား လွှတ်တော် ဥက္ကဌ ဦးခင်အောင်မြင့် အတူ နိုင်ငံခြား ခရီးစဉ်တွေမှာ အစိုးရ အလိုကျ ဘင်္ဂါလီ (ရိုဟင်ဂျာ) တွေကို နှိပ်စက်နေခြင်း မရှိဘူး၊ ရိုဟင်ဂျာ ဆိုတာ မြန်မာနိုင်ငံမှာ မရှိဘူးလို့ မိမိရဲ့ ကိုယ်ကျိုး စီးပွားကို ရှေ့ရှုပြီး လိမ်ညာပေးခဲ့သူမို့ အခုလာမယ့် ရွေးကောက်ပွဲမှာ ရွေးချယ်ခံခွင့်နဲ့ ဂုဏ်ပြုခံနေရခြင်း ဖြစ်ပါတယ်။ အဲဒီ အမတ်တစ်ယောက် ရွေးချယ်ခံရဖို့ လိုအပ်တဲ့ မဲအရေအတွက်ကလည်း အဲဒီ မဲဆန္ဒနယ်ထဲက ၆၀၀၀ ကျော်လောက်သာ လိုအပ်တာမို့ ရွေးကောက်ပွဲ မတိုင်ခင် အစိုးရ အလိုတော်ရိ မိသားစုဝင်များကို စည်းရုံးပြီး အစိမ်းနုရောင် ကဒ်ပြား ကိုင်ခိုင်း၊ ဘင်္ဂါလီနဲ့ ပြုနိုင်ငံသား ထုတ်ပေးပြီး မဲရအောင် ယူသွားမယ်လို့ စီစဉ်ထားတာ သိရတယ်။
အဲဒီတော့ ပြည်ခိုင်ဖြိုး အမတ်တွေထဲက အုပ်စုတစ်စု (အစိုးရ အလိုကျ နှုတ်ပိတ်နေခဲ့တဲ့ အုပ်စု) ကတော့ သူတို့ ရွေးချယ်ခံခွင့် ရရှိရေးအတွက် ရိုဟင်ဂျာများကို အစိမ်းနုရောင် ကဒ်ပြား ကိုင်ခိုင်းဖို့ စည်းရုံးပေးမယ်လို့ ပါတီ ဗဟိုကို ကတိပြုပြီး ရိုဟင်ဂျာ လူထုများ ရှိတဲ့ မောင်တော၊ ဘူးသီးတောင်နဲ့ စစ်တွေ မြို့များကို ဖုန်းများဆက်ပြီး လိုက်လံ စည်းရုံးနေတာလည်း ကြားသိနေရပါတယ်။
အဲဒီတော့ ရိုဟင်ဂျာလူထုမှာ ရွေးချယ်စရာ နှစ်လမ်း ရှိနေပါတယ်။ အစိမ်းနုရောင် ကဒ်ပြားကိုင်၊ နိုင်ငံသား စီစစ်ခံပြီး၊ ပြုနိုင်ငံသား ကဒ်ပြား ကိုင်မလား? ဒါမှမဟုတ် ရိုဟင်ဂျာနဲ့ နိုင်ငံသားကဒ် (ပန်းရောင်) ရအောင် ဆက်လက် ချီတက်မလား?
ခေတ်အဆက်ဆက်မှာ ရိုဟင်ဂျာ တိုင်းရင်းသား အဖြစ် နိုင်ငံသား အခွင့်အရေး အပြည့်အ၀နဲ့ နေထိုင်လာတဲ့ ရိုဟင်ဂျာများ အတွက် ပြည်ခိုင်ဖြိုး အမတ် ရွေးချယ်ခံခွင့်နဲ့ မဲပေးခွင့်က အရေးမကြီးပါဘူး။ အရေးကြီးတာက “ရိုဟင်ဂျာ” သာ ဖြစ်ပါတယ်။
အဲဒီတော့ ရိုဟင်ဂျာများကို လူမျိုး၊ ဘာသာ မပါတဲ့ ပန်းရောင်ကဒ်ပြားများ ထုတ်ပေးရင် လက်ခံနိုင်ဖွယ် ရှိသလို၊ လူမျိုး နေရာမှာ “ရိုဟင်ဂျာ” ပါတဲ့ ပန်းရောင် ကဒ်ပြား ထုတ်ပေးရင်လည်း မှန်ကန်တဲ့ ရပိုင်ခွင့်သာ ဖြစ်ပါတယ်။
အဲဒီနှစ်မျိုးကလွဲပြီး ကျန်တာတွေ ရိုဟင်ဂျာ လူထု အတွက် အရေးမကြီးသလို၊ နှစ်ကြိမ်တိုင်တိုင် အလိမ်ခံရဖူးသူတွေမို့၊ ဘယ်လိုဖြစ်လာမှာဆိုတဲ့ မက်လုံးများကို မယုံကြည်ဘဲ မိမိတို့ ဆုံးရှုံးသွားတဲ့ ရပိုင်ခွင့်များအတွက် ဆက်လက်ချီတက်ကြပါလို့ မြေပြင်က ရိုဟင်ဂျာ ညီနောင် တစ်ဦးက ရိုဟင်ဂျာများ အားလုံးကို တိုက်တွန်း နှိုးဆော်အပ် ပါကြောင်း။
