နောက်ဆုံးသတင်း/ဆောင်းပါးများ

ကျားခေါင်းတောင်တွင် ဆွဲ၊တင်၊စစ် ၌ မပါဝင်ခဲ့သူများကို အင်ဒိုနီးရှားမှ အထောက်အပံ့ ပစ္စည်းများ မပေး

Rohingya Eye
RB News
29.1.2017

မောင်တော ။ ။ ရခိုင်ပြည်နယ်၊ မောင်တောမြို့နယ် မြောက်ပိုင်း ကျားခေါင်းတောင် ကျေးရွာအပါအ၀င် မြောက်ပိုင်းရှိ ကျေးရွာ အချို့တွင် အင်ဒိုနီးရှားနိုင်ငံမှ အထောက်အပံ့ ပစ္စည်းများ ပေးဝေခဲ့ရာ ဆွဲ၊တင်၊စစ် တွင် မပါဝင်ခဲ့သူများကို ခွဲဝေ မပေးခဲ့ကြောင်း သတင်း ရရှိပါသည်။

မောင်တောမြို့နယ် မြောက်ပိုင်း ကျားခေါင်းတောင် ကျေးရွာတွင် အိမ်ထောင်စု (၂၁၇) စုရှိပြီး၊ ဆွဲ၊တင်၊စစ် စစ်ဆေးခဲ့ရာတွင် အိမ်ထောင်စု (၁၅၅) စုသာ ဓါတ်ပုံအရိုက်ခံခဲ့ကြောင်း သိရှိရသည်။ လွန်ခဲ့သည့် ၂၀၁၆ ခုနှစ် နိုဝင်ဘာလတွင် ယင်းကျေးရွာမှ အိမ်ခြေ ၄၇ လုံးနီးပါးကို စစ်သားများက မီးရှို့ဖျက်ဆီးခဲ့သည်။ မီးရှို့ဖျက်ဆီးခံရသည့် အိမ်များမှ မိသားစုဝင်များသည် လုံခြုံသော နေရာသို့ထွက်ပြေးခိုလှုံနေကြသဖြင့် အချိန်မီ စစ်ဆေးခံရန် လာရောက်ခြင်း မရှိခဲ့ကြောင်း၊ အချို့သော မိသားစုဝင်များက စစ်တပ်ကိုကြောက်ရွံ၍ လာရောက်၍ စစ်ဆေးခံခြင်း မရှိကြောင်း ဒေသခံများက RB News သို့ပြောသည်။

စစ်ဆေးခံခြင်း မရှိသည့် မိသားစု အများအပြားမှာ ကျေးရွာတွင် နေထိုင်လျက် ရှိနေလျက်ရှိပြီး၊ ဇန်န၀ါရီလ (၂၇) ရက်နေ့ နေ့လည် (၂) နာရီတွင် ယင်းကျေးရွာသို့ မောင်တောမြို့နယ် အုပ်ချုပ်ရေးမှူးနှင့် အဖွဲ့ရောက်ရှိလာပြီး အင်ဒိုနီးရှားနိုင်ငံမှ ထောက်ပံ့ပေးခဲ့သည့် ပစ္စည်းများ ခွဲဝေပေးခဲ့ရာ ဆွဲ၊တင်၊စစ် စစ်ဆေးခံခဲ့သည့် မိသားစု (၁၅၅) စုကိုသာ ခွဲဝေပေးခဲ့ကြောင်း ဒေသခံများက ပြောပါသည်။

ကျားခေါင်းတောင် ကျေးရွာအတွက် ထမိန် အထည် (၂၀၀)၊ ဂျူံ (၄၉) အိတ် ခွဲတမ်း ရရှိခဲ့သော်လည်း ခွဲဝေရာတွင် လူဦးရေ (၁၅၅၀) ဦးမှ လူတစ်ဦးလျှင် ဂျူံ (၃) ဗူး၊ ခေါက်ဆွဲခြောက်ထုပ် (၃) ထုပ်စီ ရရှိခဲ့ပြီး၊ အိမ်ထောင်စု တစ်စုလျှင် ထမိန် တစ်ထည်စီ၊ စုစုပေါင်း အိမ်ထောင်စု (၁၅၅) စု အတွက် (၁၅၅) ထည် ရရှိခဲ့သည်။ ဆွဲ၊တင်၊စစ် တွင် ၀င်ရောက်၍ စစ်ဆေးခံခြင်း မရှိခဲ့သည့် မိသားစုများမှာ ရွာအတွင်းတွင် နေထိုင်လျက် ရှိသော်လည်း အထောက်အပံ့ ပစ္စည်းများ မရရှိခဲ့ကြောင်း သိရှိရသည်။

အင်ဒိုနီးရှားမှ ပေးပို့ရာတွင် ဘီစကွတ်များ ပါရှိသော်လည်း ကျားခေါင်းတောင် ကျေးရွာတွင် မရှိခဲ့ကြောင်း၊ ပွင့်ဖြူချောင်း ကျေးရွာတွင်မူ လူတစ်ဦးလျှင် ဘီစကွတ် (၃) ထုပ်၊ ခေါက်ဆွဲခြောက် (၅) ထုပ်၊ ဂျူံ တစ်ကီလိုဂရမ် နီးပါးစီနှင့် အိမ်ထောင်စုတစ်စုလျှင် ထမိန်တစ်ထည်စီ ရရှိခဲ့ကြောင်း၊ အိမ်ထောင်စု (၂၈၀) စု ရှိသော်လည်း အိမ်ထောင်စု (၁၆၀) သာ ရရှိခဲ့ကြောင်း ဒေသခံများ၏ ပြောကြားချက်များအရ သိရှိရသည်။

အလားတူ ရေခပ်ချောင်းခွဆုံ ကျေးရွာတွင် ထမိန် (၃၅၀) ထည်၊ ဘီစကွတ် အထုပ်ကြီး ၂၃ ထုပ်၊ ခေါက်ဆွဲခြောက် အထုပ်ကြီး (၁၈၀)၊ ဂျူံ (၈၀) အိတ် ခွဲတမ်းချပေးခဲ့ရာ လူတစ်ဦးလျှင် ခေါက်ဆွဲခြောက် ၂ ထုပ်၊ ဂျူံတစ်ကီလိုဂရမ်နီးပါးနှင့် ဘီစကွတ် ၂ ထုပ်စီ ရရှိခဲ့ကြောင်း၊ ယင်းကျေးရွာတွင် လူဦးရေ တစ်ဝက်သာကျော်သာ ရရှိခဲ့ကြောင်း သိရှိရသည်။

ဇန်န၀ါရီလ (၂၈) ရက်နေ့တွင် ဦးရှည်ကျ ကျေးရွာတွင်လည်း အင်ဒိုနီးရှားမှ ထောက်ပံ့ပစ္စည်းများ ပေးခဲ့ပြီး၊ အိမ်ထောင်စု တစ်စုလျှင် ထမိန် တစ်ထည်၊ လူတစ်ဦးလျှင် ဘီစကွတ် (၁) ထုပ်၊ ခေါက်ဆွဲခြောက် တစ်ထုပ်နှင့် ဂျူံနှစ်ဗူးစီ ပေးခဲ့ပြီး လူဦးရေ (၇၀၀၀) ကျော်ရှိရာမှ (၄၀၀၀) ကျော်သာ ရရှိခဲ့သည်။

လူ့အခွင့်အရေး စောင့်ကြည့်နေသူ တစ်ဦးက “အင်ဒိုနီးရှားနိုင်ငံက ဒုက္ခရောက်နေတဲ့သူတွေ အတွက် အကူအညီပေးခဲ့တာ ဖြစ်ပေမယ့် အိမ်မီးရှို့ခံရတဲ့လူတွေ မရတာ တွေ့ရတယ်။ အချို့နေရာမှာ ဘီစကွတ်မုန့် မရတာ ရှိတယ်။ အချို့နေရာမှာ ထမိန်မရတာ ရှိတယ်။ အစိုးရကနေ တဆင့် ပေးလို့ ပို့တဲ့အတိုင်း မရတာလို့ထင်တယ်” ဟု ပြောသည်။


အင်ဒိုနီးရှားနိုင်ငံမှ ပေးပို့သည့် စားသောက်ဖွယ်ရာများ

Comment ရေးရန်

Rohingya Exodus